Atalǵan sessııaǵa Bilim jáne ǵylym vıse-mınıstri Ashat Aımaǵambetov, «Atameken» Ulttyq kásipkerler palatasy Aqparattyq-kommýnıkasııalyq tehnologııalar, bilim berý jáne ınnovasııa komıtetiniń tóraǵasy Murat Ábenov, Mádenıet jáne sport mınıstrligi, Tilderdi damytý jáne qoǵamdyq saıası jumys komıtetiniń tóraǵasy Qýat Borash spıker retinde qatysyp, baǵdarlama aıasynda atqarylǵan jumystardyń bir parasyna toqtaldy.
Bilim berýdi ekonomıkalyq ósýdiń jańa modeliniń ortalyq býynyna aınaldyrý tóńireginde sóz qozǵaǵan Bilim jáne ǵylym vıse-mınıstri Ashat Aımaǵambetov kásiptik standarttardy eńbek naryǵynyń talaptaryna saı jańartý týrasynda baıandady.
«Rýhanı jańǵyrý dástúrden alshaqtaý emes, kerisinshe ulttyq kodymyzdy, tarıhymyzdy saqtaı otyryp sana ashyqtyǵy arqasynda biliktilik pen básekege qabiletti bola bilý. Elbasy qoıǵan mindetter negizinde qazaq tilindegi 100 jańa oqýlyq boıynsha ózge tilderden 17 kitap aýdaryldy. 2018 jyly saıasattaný, ınformatıka, áleýmettaný salasyndaǵy taǵy 30 kitapty aýdarý josparda bar. Qyrkúıek aıynan bastap eldegi joǵarǵy oqý oryndarynda oqytyla bastaıdy», dedi Ashat Aımaǵambetov.
Vıse-mınıstrdiń aıtýynsha, elimizdiń 16 óńiri boıynsha ólketaný oqýlyqtary ázirlengen. Jýyq arada barlyq mektepterde 7 synyptan bastap О́lketaný oqýlyǵy oqý prosesine engizilip, túrli týrıstik jumystar júrgizilmek.
Aıa О́MIRTAI,
«Egemen Qazaqstan»
