Osymen ekinshi ret ótkizilip otyrǵan ulttyq báıgeniń bıylǵy jańalyǵy – tek teatr tóńireginde júrgen talanttardy ǵana emes, opera, balet, ónertaný sekildi ónerdiń birqatar salalarynda júrgen úzdikter úshin de júlde taǵaıyndaǵany boldy. Baıqaý bir jylǵy shyǵarmashylyq jumystardy sarapqa salyp, qara úzip kelgen daralarǵa 18 atalym boıynsha syılyq tabystady. Baıqaýdyń talap údesinen shyqqan talanttardyń bári M.Lermontov atyndaǵy memlekettik akademııalyq orys teatrynda ótken saltanatty keshte bas qosyp, óner adamdarynyń ǵana emes, ózge sanattaǵylardyń da qyzyǵýshylyǵyn oıata bastaǵan «Sahnager» syılyǵynyń qýanyshyn birge bólisti. Saltanatty sharany Qazaqstan teatrlary assosıasııasynyń prezıdenti, KSRO halyq ártisi, KSRO jáne Qazaqstan memlekettik syılyǵynyń laýreaty, Qazaqstannyń Eńbek Eri Asanáli Áshimov pen Qazaqstannyń eńbek sińirgen qaıratkeri, M.Áýezov atyndaǵy Qazaq memlekettik akademııalyq drama teatrynyń dırektory Ashat Maemırov quttyqtaý sózben ashty.
Assosıasııa keńesiniń sheshimimen anyqtalǵan úzdikter qatarynyń qarasy byltyrǵyǵa qaraǵanda bıyl áldeqaıda mol kórindi. Bir ǵana «Úmit» júldesi jeńimpazdary esiminiń uzyn sany otyzǵa jetip jyǵylǵanyn aıtsaq ta, jetkilikti bolar deımiz. Respýblıka teatrlarynda eńbek etip, ártúrli óner jobalarynda jarqyraı kórinip júrgen jas ártisterdiń árqaısysy arnaıy dıp-
lom men 200 myń teńgeni enshiledi.
«Sahnalyq ǵumyr» atalymy bar sanaly ómirin «teatr deıtin bir sıqyrǵa» arnap, sahnanyń jankeshti sarbazdaryna aınalyp, ulttyq teatr óneriniń damýy úshin aıryqsha eńbek sińirip kele jatqan jeti maıtalmanǵa tabystalǵany jalpy jurtty tebirentti. Olar – M.Áýezov teatrynyń abyz ártisi Sábıt Orazbaev, N.Sas teatrynyń sańlaǵy Tatıana Tarskaıa, «TIýZ»-dyń talantty aktrısasy Roza Áshirbekova, Shyǵys Qazaqstan oblystyq Abaı atyndaǵy mýzykalyq drama teatrynyń darabozy Beken Imahanov, osy teatrdyń irgesin kóterisken irilerdiń biri Kúlásh Sakıeva, Memlekettik qýyrshaq teatrynyń marǵasqa ártisi Sábılá Ábýova jáne belgili rejısser Rýben Andrıasıan.
«Úzdik akterlerdiń» qatarynda Roman Chehonadskıı, Dáýren Serǵazın, Aınur Berdimuhamedova, Antonına Pıak, Tóleýbek Aralbaı, Kenjebek Basharov, Tolqyn Nurbekova, Gúlbahar Nasyrova, Bolat Momynjanov atalsa, sondaı-aq «Úzdik menedjer» bolyp Berik Jámenov, «Úzdik synshy» Álııa Bópejanova, «Úzdik
teatrtanýshy» Erkin Jýasbek, «Úzdik dramatýrg» aqyn Iran-Ǵaıyp, «Úzdik sahna sýretshisi» Baqyt Sraılov, «Úzdik rejısser» Natalıa Dýbs kórermen qurmetine bólendi. Al Qazaqstan mádenıetiniń órkendeýine óz úlesin qosyp, «Astana Opera» teatryndaǵy qoıylymdarda jáne alys-jaqyn shetelderde sátti óner kórsetip júrgen Súndet Baıǵojın «Úzdik opera solısi», osy teatrdaǵy áriptesi Mádına Basbaeva «Úzdik balet ártisi» atandy. «Teatr óneriniń damýyna qosqan erekshe úlesi úshin» atalymy boıynsha taǵaıyndalǵan júldeler taǵy da birqatar sahna óneriniń saıypqyrandaryna buıyryp, olardyń bári de Halyqaralyq teatr kúni ónerge qyzmet etip júrgenderdiń barshasyn qýanyshqa bóleıtin «Sahnager» syılyǵy úshin alǵysyn bildirdi.
Aıgúl AHANBAIQYZY,
«Egemen Qazaqstan»
ALMATY
