Aldaǵy jeksenbi kúni Brıtanııada kásipqoı bokstyń aýyr salmaqtaǵy eki alyby, áli jeńilis ne ekenin bilmeı kele jatqan – brıtanııalyq Entonı Djoshýa (20-0, 20 KO) men jańazelandııalyq Djozef Parker (25-0, 18 KO) álem chempıony ataǵy úshin jekpe-jek ótkizedi. Keshe eki boksshy da jekpe-jek aldynda kóz arbasyp, aıqas aldyndaǵy pikirlerin aıtty.
Entonı Djoshýa: «Menińshe aýyr salmaqtaǵylar kásipqoı bokstyń betke ustarlary bolý kerek. Sondyqtan, biz jeksenbi kúni aıryqsha jekpe-jek ótkizýge tıispiz. Parkerdiń karerasynda áli birde-bir jeńilis joq. Sondaı-aq ol álem chempıony. Ol óte jyldam ári soqqy kótere alatyn boksshy. Bul jekpe-jek men úshin úlken synaq bolǵaly tur. Degenmen, mende ony jeńetin kúsh bar. Qajet bolsa, 12 raýnd tolyq judyryqtasyp beremin. Biraq, aıqas merziminen buryn aıaqtalatyn sııaqty. О́z basym ony 9-raýndta nokaýtpen jeńemin dep otyrmyn».
Djozef Parker: «Jekpe-jekke tolyq daıynmyn dep esepteımin. Aýyr salmaqtaǵy barlyq belbeýdi Jańa Zelandııaǵa alyp ketetinimdi sezip otyrmyn. Biz Djoshýa men onyń komandasyn qurmetteımiz. Dál qazir ekeýmizdiń de babymyz kelisip tur. Men Brıtanııaǵa tek jaqsy gonorar alý úshin emes, Djoshýadaǵy barlyq beldikti alyp ketý úshin keldim».
Álı BITО́RE,
«Egemen Qazaqstan»
