Zııankesterdiń kúrt kóbeıýine áser etetin negizgi faktor kúnniń jylýy ǵana emes, túrli turmystyq qaldyqtardyń beı-bereket tastalýy. Osynyń saldarynan qala aýmaǵyndaǵy saıabaqtarda, ásirese, kópqabatty úılerdiń mańynda adam densaýlyǵy úshin asa qaýipti kemirgishter kóbeıedi. Mamandardyń sózinshe, kemirgishterdiń keıbir túrleri tipti ólim jaǵdaılaryna ákelip soqtyratyn juqpaly aýrýlardyń oshaǵy sanalady.
Bul aılarda, kemirgishterden bólek adam men janýarlardyń, sondaı-aq ósimdiktikterdiń parazıti bolyp tabylatyn keneden de abaı bolǵan jón. Qyshyma kene sııaqty keıbir tuqymdastary tipti kózge de shalynbaıtyn bul jándik adam boıynda bórtpe, súzek, kene ensefalıti, týlıaremııa sııaqty aýrýlardyń órbýine jol ashady. Ásirese, mundaı keneler jańbyrdan keıin kógaldy jerlerde kóptep beleń alady. Sondyqtan, kún jylysymen taýly aımaqtardaǵy tabıǵat aıasyna kókke shyǵatyn turǵyndar bul jaǵdaıdy qaperinde ustaǵany abzal. Arnaýly mamandar, zııankestermen kúres máselesi árdaıym basty nazarda, degenmen, ár azamat tazalyqqa mán berip, saq júrgeni jón degendi aıtady.
«Qala aýmaǵyn zııankesterden zalalsyzdandyrý jumystarynyń kóktemgi naýqanyna arnalǵan arnaıy keste bekittik. Sol keste negizinde taýly aımaqtar men demalys oryndarynda, qala aýmaǵyndaǵy saıabaqtarda zalalsyzdandyrý jumystary bastalady. Jappaı zalalsyzdandyrý isine quramynda tájirıbeli epıdımıolog dárigerleri bar 6 adamnan quralǵan 3 brıgada jumyldyrylmaq. Deratızasııalaý jumystary Almaty qalasynyń ár aýdanynda kezeń-kezeńimen júrgiziledi. Barlyq turǵyndardy úı aýlalary men qoǵamdyq oryndarda, demalys oshaqtarynda sanıtarlyq tazalyq saqtaýǵa shaqyramyz», deıdi Almaty qalasy boıynsha dezınfeksııa ortalyǵy fılıalynyń basshysy Esen Bekbosynov.
Arman OKTIаBR,
«Egemen Qazaqstan»
ALMATY
