«J1–Jastar1» telearnasy, eń aldymen, 14-29 jas aralyǵyndaǵy jastarǵa arnalǵan. Ol oqýshylar, stýdentter, jas mamandar men túrli qyzmet aıasynda eńbek etip júrgen jastarmen qatar, urpaq tárbıesine nemquraıly qaramaıtyn barlyq jandar úshin de qyzyqty bolmaq. Arnanyń pishimi, jastar ómirindegi mańyzdy jáne qyzyqty oqıǵalarǵa negizdelgen. Telearnanyń kontenti as úıi, sán jáne sulýlyqtan bastap shytyrman, tylsym oqıǵalarǵa, sportqa, telehıkaıalar men álemdik kınematografııanyń hıtterine, áleýmettik realıtı men otbasylyq qarym-qatynas, bala tárbıeleý jáne densaýlyq týraly tok-shoýlarǵa toly tanymdyq, pýblısıstıkalyq jáne oıyn-saýyqtyq baǵdarlamalardan turady. Baǵdarlamalarda jastardyń máseleleri, múmkindikteri men ózin-ózi tanytýy qarastyrylady. «J1–Jastar1» telearnasy bul – búgingi tańda jastardyń ózine arnanyń mazmunyn toltyrýǵa múmkindik berip otyrǵan, esh arnalarǵa uqsamaıtyn ashyq alań usynǵan biregeı erekshe telearna», dedi arnanyń bas dırektory Ilıas Ysqaqov.
«J1–Jastar1» telearnasy Qazaqstan jastarynyń talaptaryn qanaǵattandyratyn zamanaýı televızııalyq trendterdi taratatyn, jastardyń jobalaryn, oı-pikirlerin qoldaýǵa, sonymen qatar olardyń arasyndaǵy ózekti máselelerdi sheshýge baǵyttalǵan jańa pishimdegi arna. Telearna 2018 jyldyń 28 naýryzynda ID TV platformasynda, YouTube jáne Instagram áleýmettik jelilerinde iske qosyldy. Bolashaqta ony Otaý TV kabel júıesi arqyly taratý josparlanýda.
Raýan QAIDAR,
«Egemen Qazaqstan»
