Eki taraptyń ózara ýaǵdalastyǵy boıynsha ındýstrııalyq park qurylyp, segiz joba sheńberinde pestısıdter men tyńaıtqyshtar, mashına jasaý zaýyttary, logıstıkalyq ortalyq, taǵy basqa óndiristik oshaqtar salynatyn bolady. Ol úshin Qyzyljar aýdany aýmaǵynan 400 gektar jer telimi bólingen. Qaǵaz-sellıýloza kombınaty men temir joldyń eki jelisiniń qurylysy bıyl bastalady. Qarjylyq jaǵynan qamtamasyz etýdi kórshiles eldiń ınvestorlary óz mindetine alǵan. 1,5 myń jumys oryndary qurylady dep jobalanýda.
Jýyrda kompanııanyń bas dırektory Jang Ksıýmıng bastaǵan delegasııa óńirge kelgen jumys saparynda M.Qozybaev atyndaǵy Soltústik Qazaqstan memlekettik ýnıversıtetiniń basshylyǵymen kezdesip, bilikti kadrlar daıyndaý jaıy qyzý talqylandy. Keleshekte ınjener, agronom, energetık, bıotehnolog mamandyqtaryna suranystyń artatyny eskerilip, olardy tájirıbeden ótkizýdiń, básekelestikke qarymdylyǵyn arttyrýdyń, jumysqa ornalastyrýdyń naqty qadamdary atap kórsetildi. Ýnıversıtettiń rektory Serik О́mirbaev óz sózinde Qytaı kompanııasy salatyn óndiris oryndaryn jergilikti kadrlarmen tolyqtyrýǵa ázir ekendikterin, materıaldyq-tehnıkalyq bazany jańartý, professor-oqytýshylar quramyn irikteý jumystary jalǵasyp jatqanyn jetkizdi. Qytaılyq kompanııa ókilderi usynysty qabyl alyp, jumys kúshi zárýligi birigip sheshiletinine, barlyq qajetti jaǵdaılar jasalatynyna sendirdi. Olardy eńseli oqý ornynyń aýylsharýashylyq jáne tehnıkalyq áleýeti de qyzyqtyrdy. Aýqymdy jobalar úsh kezeńnen turady. Alǵashqysy jyl aıaǵyna deıin paıdalanýǵa beriledi. Osylaısha ózara kelisimmen bekitilgen memorandým sheńberinde iri qara malǵa arnalǵan jem-shóp óndirisi, agrohımııa jáne aýyr ónerkásip salasyndaǵy qoldanbaly ǵylymı-zertteýler keshendi túrde iske asyrylady. Buǵan qosa aldaǵy ýaqytta jergilikti stýdentter qytaılyq ozyq kásiporyndarda tájirıbeden ótip, ınvestısııalyq baǵdarlamalar boıynsha salynatyn zaýyttarda eńbek ete alady.
– «Prezıdenttiń bes áleýmettik bastamasy» Úndeýinde atap ótilgendeı, ónerkásiptik revolıýsııa jaǵdaıyndaǵy jańa ekonomıkada zor suranysqa ıe jańa mamandar daıarlaý – basty talaptardyń biri. Memorandým negizinde jol kartasy jasalyp, jylyna 10-15 stýdent Qytaıda biliktilikteri men sheberlikterin shyńdap qaıtady. Kórshiles elde turyp jatqan etnostyq qazaqtardy qyzmetke shaqyrýdyń joldary oılastyrylǵan», dedi halyqaralyq strategııa jáne yntymaqtastyq máseleleri jónindegi prorektor Aıdos Muqataev.
О́mir ESQALI,
«Egemen Qazaqstan»
Soltústik Qazaqstan oblysy
