Selektorlyq rejimde ótken otyrysqa Parlament Májilisiniń depýtattary, Ulttyq komıssııanyń, Ortalyq saılaý komıssııasynyń músheleri, halyqaralyq uıymdardyń basshylary, sonymen qatar saıası partııalardyń, áıelder isteri jáne otbasylyq-demografııalyq saıasat jónindegi óńirlik komıssııalardyń, aımaqtyq saılaý komıssııalarynyń ókilderi qatysty.
Otyrysty ashqan Gúlshara Ábdiqalyqova «Prezıdenttiń bes áleýmettik bastamasy» áıelder qaýymynyń qyzmetine zor serpin bergenine erekshe toqtalyp ótti.
«Elbasy Nursultan Ábishuly Nazarbaevtyń Qazaqstan halqyna arnaǵan «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda jáne «Bolashaqqa baǵdar: rýhanı jańǵyrý» baǵdarlamalyq maqalasynda qoıylǵan mindetterdi oryndaý áıelder máselesimen aınalysatyn barlyq uıymdardyń belsene qatysýyn talap etedi», dedi Memlekettik hatshy.
G.Ábdiqalyqova Qazaqstannyń 1995 jyldan – Beıjiń deklarasııasyna qosylǵan kezden genderlik saıasatty júıeli túrde iske asyrýǵa bet burǵanyn aıtty. Teń quqyqtyqtyń zańnamalyq negizin damytýǵa múmkindik bergen 2006-2016 jyldarǵa arnalǵan Genderlik teńdik strategııasy tabysty iske asyryldy.
Dúnıejúzilik ekonomıkalyq forýmnyń genderlik ındeksine sáıkes, Qazaqstan ótken jyldyń qorytyndysy boıynsha 144 memleket arasynda 52-orynǵa, onyń ishinde «áıelderdiń ekonomıkalyq sharalarǵa qatysýy jáne múmkindikteri» jónindegi kórsetkish boıynsha – 30, «densaýlyq ındeksi» boıynsha – 36, al «bilim deńgeıi» boıynsha 48-orynǵa ornalasty.
2017 jyldyń basynda saıası memlekettik qyzmetshiler arasyndaǵy áıelderdiń úlesi – 10 paıyz, Parlamenttiń depýtattyq korpýsynda 22 paıyzǵa jetti.
Sonymen qatar otyrysta Ortalyq saılaý komıssııasynyń áıelderdiń saılaý prosesine qatysýynyń genderlik aspektileri jónindegi aqparaty tyńdaldy. Búginde búkil el boıynsha 739 áıel (usynylǵan kandıdat áıelder sanynyń 22,2 paıyzy) depýtat bolyp saılanǵan.
Budan bólek, memlekettik qyzmettegi áıelderdi sheshim qabyldaý deńgeıine deıin ilgeriletý máselesi talqylandy. Barlyq memlekettik qyzmetshilerdiń 55 paıyzyn (50,5 myń adam) áıelder qurap otyr. Sonymen birge basshy laýazymdaryndaǵy áıelderdiń úlesi – 39,5 paıyz (9,6 myń adam), onyń ishinde joǵarǵy basshy laýazymdary boıynsha – 29 paıyz. Bul deńgeı Ekonomıkalyq yntymaqtastyq jáne damý uıymynyń ortasha kórsetkishine sáıkes keledi.
Sondaı-aq Qostanaı jáne Ońtústik Qazaqstan oblystarynyń aqparattary tyńdaldy. Qostanaı oblysy jergilikti memlekettik organdardaǵy áıelder sany boıynsha kósh bastap tur. Máslıhattardyń barlyq deńgeıinde áıelder depýtattyq oryndardyń 31 paıyzyn, ákimshilik memlekettik qyzmetshilerdiń 61 paıyzyn quraıdy.
Otyrys sońynda Memlekettik hatshy G.Ábdiqalyqova memlekettik organdarǵa birqatar naqty tapsyrma berdi.
Abaı ASANKELDIULY,
«Egemen Qazaqstan»
Sýretti túsirgen Erlan OMAR,
«Egemen Qazaqstan»
