Mundaı áńgimeniń qozǵalýyna Senat depýtattary Murat Baqtııaruly men Bekmyrza Elamanovtyń Qyzylorda oblysy, Qarmaqshy, Jalaǵash jáne Jańaqorǵan aýdandarynyń turǵyndarymen, sharýa qojalyǵy ókilderimen, ardagerler keńesimen, aýdandyq maslıhat depýtattarymen, emhana ujymymen sondaı-aq aýdan belsendilerimen kezdesý barysynda osy salada jumys istep jatqan eńbekkerlerdiń aýyl sharýashylyǵy kooperatıvteri týraly zań áli óz dárejesinde jumys istep jatqan joq degen ýáji sebep boldy.
«Kooperatıvterdiń rólin kúsheıtý úshin, olardy qanattandyratyn yntalandyrý tetigi qarastyrylyp, qajetti dárejede qarjylandyrylýy kerek» dedi sharýa qojalyqtarynyń ókilderi.
Kezdesý kezinde depýtattar turǵyndarmen oı-pikirler almasyp, sońy emen-jarqyn ashyq áńgimege ulasty. Elbasy úndeýiniń basymdyqtaryn nátıjeli júzege asyrýǵa jan-jaqty talqylaýlar jasalyp, senatorlar jınalǵan jurtty elimizdi órkendetý jolynda jumyla jumys jasaýǵa shaqyrdy.
Sonymen qatar, Senat depýtattary aýdan aktıvterimen birge apatty jaǵdaıdaǵy aýrýhanalardy aralady, sheshimin tappaı kele jatqan Jalaǵash aýdandyq ortalyq aýrýhana qurylysyn qarjylandyrý, Jalaǵash aýdanynyń ortalyǵyn gazdandyrý máselesi sııaqty aýqymdy problemalyq suraqtarǵa nazar aýdardy.
Murat Bahtııaruly jáne Bekmyrza Elamanovpen kezdesken aýyl turǵyndary ózderiniń ótinishteri men usynystaryn aıtty. Solardyń biri – jerdi jalǵa berý ınstıtýtyn qalyptastyrý máselesi. Jınalǵan halyq kókeılerindegi suraqtarǵa qanaǵattanarlyq jaýap alyp tarqasty.
