Foto: Erlan OMAR, «Egemen Qazaqstan»
Is-sharaǵa Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva jáne komıtettiń birqatar ókilderi qatysty. Senatorlar kásiporyn nysandaryn aralap, basqarý tıimdiligi, ekologııa sekildi keleli máselelerge toqtaldy.
«Balamaly energetıka – bolashaq kepili. Biz oǵan umtylýymyz qajet. Bul densaýlyǵymyz úshin qajet. Áıtse de, másele halyqtyń taza aýa úshin qanshalyqty tóleýge daıyn ekenine baılanysty», dedi D.Nazarbaeva.
Komıtet tóraǵasy D.Nazarbaeva otyn kólemin únemdeýge múmkindik beretin ınnovasııalyq tehnologııalardy engizý jóninde surady. Senatordyń paıymdaýynsha, únemshil bolmaýdyń sebebinen artyq jylý dalaǵa ketip jatyr. Sondaı-aq ol kásiporyn jumysshylaryn turǵyn úımen qamtamasyz etý sekildi birqatar ózekti máselelerge nazar aýdardy.
Depýtattar saýalyna oraı Astana ákiminiń orynbasary Qosman Aıtmuhametov: «Aýa raıy boljamy boıynsha – 35 gradýs bolsa, JEO-ǵa 120 gradýs beriledi. Alaıda tańerteń temperatýranyń kútilgen deńgeıden joǵary ekenin kóremiz. Sondyqtan sý aǵyndaryn rettep, jylý tranzıtteri temperatýrany baqylap otyratyn avtomatty basqarý baǵdarlamasy ázirlenýde», dedi.
Sonymen qatar D.Nazarbaeva kásiporynnyń qala kelbetine keri áser tıgizip otyrǵanyn da atap ótti. Q.Aıtmuhametovtiń sózine qaraǵanda, bıyl aýaǵa zııandy shyǵarylym kólemi azaıady. Osynyń nátıjesinde ekologııa 30-40 paıyzǵa tazara túspek.
Budan keıin senatorlar kásiporyn jumysshylarymen kezdesip, olardyń suraqtaryna jaýap berdi. D.Nazarbaeva «Prezıdenttiń bes áleýmettik bastamasynda» aıtylǵan basymdyqtarǵa toqtalyp, mamandardy kásibı biliktilikti arttyrýǵa shaqyrdy.
Jalpy, «Astana-Energııa» 2004 jyly qurylǵan bolatyn. Onyń quramyna JEO-1 jáne JEO-2 kiredi.
Abaı ASANKELDIULY,
«Egemen Qazaqstan»
