Atap aıtqanda, Parlament Senaty Tóraǵasynyń orynbasary Bektas Beknazarov jáne senatorlar Serik Bekturǵanov pen Jeńis Nurǵalıev Qostanaı óńirinde boldy. Olar oblys ortalyǵyndaǵy jańa shaǵyn aýdanda «Nurly jer» baǵdarlamasynyń iske asýy barysymen tanysty jáne qurylys mekemeleriniń basshylarymen kezdesýde Elbasy N.Nazarbaevtyń bes áleýmettik bastamasyn júzege asyrý máselelerin talqylady. Aımaqqa sapar aıasynda depýtattar oblystyq sottyń jańa ǵımaratynyń qurylysyn kórip, meshit jáne kúshtik sport túrleri akademııasyna bardy. Sondaı-aq oblys ákimi Arhımed Muhambetovpen kezdesý barysynda aımaqtyń áleýmettik-ekonomıkalyq damýy jáne Prezıdenttiń bes áleýmettik bastamasyn iske asyrý josparlary talqylandy.
* * *
Al Pavlodar oblysyndaǵy Maı aýdanynda bolǵan senator Manap Kóbenov elimizdiń ońtústik óńirlerinen kelgen jas mamandarmen kezdesip, olardyń turǵyn jaǵdaılary jáne eńbekaqy mólsheri jaıynda áńgime órbitti.
Elbasy N.Nazarbaevtyń bes áleýmettik bastamasyn jurtshylyqqa túsindirý aıasynda depýtat aýdan aktıvimen kezdesýde bilim berý, turǵyn úı qurylysy, nesıe berý, salyq aýyrtpalyǵyn tómendetý máselelerin talqylady.
Maı aýdanynyń turǵyndary Prezıdent Úndeýine tolyqtaı qoldaý bildirdi, al memlekettik organdar búgingi tańda Elbasynyń aýqymdy áleýmettik bastamalaryn iske asyrýǵa ázir.
* * *
Senat depýtattary Murat Baqtııaruly men Bekmyrza Elamanov Qyzylorda oblysynyń Qarmaqshy, Jalaǵash jáne Jańaqorǵan aýdandarynda bolyp, ardagerler keńesi, sharýa qojalyqtary ókilderi, aýdandyq máslıhat depýtattary, medısına salasynyń qyzmetkerlerimen kezdesti.
Kezdesý kezinde Elbasy Úndeýiniń basymdyqtaryn nátıjeli júzege asyrý jan-jaqty talqylanyp, senatorlar jınalǵan jurtty elimizdi órkendetý jolynda jumyla jumys jasaýǵa shaqyrdy.
* * *
Al senator Ǵumar Dúısembaev Atyraý qalasyndaǵy «Nort Kaspıan Opereıtıng Kompanı N.V» kompanııasynyń eńbek ujymymen kezdesýinde Prezıdenttiń bes bastamasyna sáıkes árbir otbasynyń baspana alýda jańa múmkindikteri bar ekenin, sondaı-aq joǵary bilim, shaǵyn nesıe berýdi kóbeıtýde jáne eńbekaqy men salyq salasynda da aýqymdy jańalyqtar bolatynyn aıtty.
Ǵ.Dúısembaev sondaı-aq «Atyraý» áleýmettik kásipkerlik korporasııasynyń, «Caspian Royal Fish» JShS jáne Atyraýdaǵy munaı mashınalaryn jasaý zaýytynda da eńbek ujymymen kezdesý ótkizdi.
* * *
Mońǵolııadan kóship kelgen qandastar ózderiniń sheshilmegen áleýmettik máselelerine alańdaıdy. Senat depýtaty Sergeı Ershovtyń Qaraǵandy oblysyndaǵy Osakarov aýdanynda jergilikti turǵyndarmen kezdesýi barysynda oralmandardyń jumysqa ornalasýy men turǵyn úımen qamtamasyz etý máseleleri áńgime boldy. Senator Prezıdent N.Nazarbaevtyń bes áleýmettik bastamasyn iske asyrý barysynda kóptegen máselelerdiń sheshimi tabylatynyna senim bildirdi.
* * *
Jergilikti atqarýshy organdarmen barlyq qyzmetterdiń tyǵyz jumys isteýi jáne tótenshe jaǵdaılardy boljaý jumystary da jetildirýdi qajet etedi. Parlament Senatynyń depýtaty Dúısenǵazy Mýsın Shyǵys Qazaqstan oblysynda jumys babyndaǵy saparda bolǵan kezinde aımaqtaǵy tasqyn sýǵa baılanysty ahýalǵa oraı osylaı dedi.
D.Mýsın aýylsharýashylyq daqyldaryn suryptaý-synaýdyń Shyǵys Qazaqstan oblystyq ınspeksııasynda da bolyp, Elbasy N.Nazarbaevtyń bes áleýmettik bastamasy týraly jan-jaqty áńgimelep berdi.
* * *
Májilis Tóraǵasynyń orynbasary, «Nur Otan» fraksııasynyń jetekshisi Gúlmıra Isımbaeva, depýtattar Gúlnar Iksanova men Zaýresh Amanjolova Almatydaǵy Q.Sátbaev atyndaǵy Qazaq ulttyq tehnıkalyq ýnıversıteti jáne Qazaq ulttyq agrarlyq ýnıversıtetinde boldy.
Depýtattar bilim berý mekemeleriniń jataqhanalaryn aralap, stýdentterdiń turmys jaǵdaıymen tanysty.
Kezdesý barysynda vıse-spıker G.Isımbaeva joǵary bilim standarttaryna sáıkes bilim berý júıesin qurý, oqýshylardyń oqý jáne turý jaǵdaıyna nazar aýdarý qajettiligine toqtaldy.
* * *
Parlament Májilisi Tóraǵasynyń orynbasary Vladımır Bojko Memleket basshysy belgilep bergen bes áleýmettik bastamanyń basty baǵyttaryn túsindirý úshin Aqtóbe oblysyna keldi. Ol aptanyń aıaǵyna deıin sozylatyn saparynyń alǵashqy kúni shalǵaıdaǵy Yrǵyz aýdanynyń jaı-kúıimen tanysty. Vıse-spıker «Nurly jer» baǵdarlamasy aıasyndaǵy memlekettik turǵyn úı baǵdarlamasy júıeli túrde júzege asyp kele jatqanyna kóz jetkizdi. Bul rette V.Bojko turǵyn úılerdi ıelenýge baǵyttalǵan jańa áleýmettik ıpotekalyq baǵdarlamanyń tıimdi tustary jóninde egjeı-tegjeıli aıtyp berdi. Sondaı-aq Parlament Májilisi Tóraǵasynyń orynbasary oblys ortalyǵyndaǵy «Meıirim» áleýmettik beıimdeý mekemesi, Alǵa aýdanyndaǵy áleýmettik jáne óndiristik nysandardy aralap, keıbir túıindi tustarǵa kóńil aýdardy.
* * *
Depýtattardyń óńirlerdegi sapary aıasynda Májilis depýtaty Saýytbek Abdraxmanov Aqmola oblysynyń Arshaly aýdanynda saılaýshylarmen júzdesýi barysynda Prezıdent N.Nazarbaevtyń bes bastamasy áleýmettik memlekettiń áleýetin álemge áıgilegen, elimizde bári de adam ıgiligine jasalatynyn kelisti kórsetken sheshim bolyp shyqqanyn naqty dáleldep aıtty. Elbasy bastamalarynyń mán-mańyzyn jan-jaqty ashqan depýtat olardyń júzege asyrylýynyń tetikteri jóninde de áserli áńgimelep, jurtshylyqtyń suraqtaryna jaýap berdi.
* * *
Májilis depýtattary Baqtyqoja Izmuhambetov pen Jeksenbaı Dúısebaev, Senat depýtaty Ǵumar Dúısembaev jumys saparymen Atyraý oblysynyń Mahambet aýdanynda Jaıyq ózeni ústinen salynyp jatqan kópir qurylysyn baryp kórdi. Jańa nysan Mahambet, Inder aýdandary arasyndaǵy kólik qatynasyn rettep, oblys ortalyǵyndaǵy keptelisti azaıtatyn bolady. Halyq qalaýlylary, sondaı-aq Mahambet aýdany turǵyndarymen kezdesip, Memleket basshysynyń bes áleýmettik bastamasyn júzege asyrýdyń basty qaǵıdalaryn talqylady.
* * *
Tómengi palata ókilderi Serik Seıdýmanov pen Erjan Qudaıbergenov Almatyda shaǵyn jáne orta bıznes ókilderimen kezdesti. Áńgimege arqaý bolǵan prezıdenttik bes bastama kásipkerler tarapynan qoldaý tapqan. «Damý» kásipkerlikti damytý qory» AQ ǵımaratynda ótken kezdesýde «Nur Otan» fraksııasynyń músheleri bastamanyń shaǵyn nesıeleý kólemin kóbeıtý baǵytynda keńinen áńgimeledi.
