Elbasynyń «Bolashaqqa baǵdar – «Rýhanı jańǵyrý» baǵdarlamasy aıasynda uıymdastyrylyp, Astana tórin 1-shi sáýirden 5-shi sáýirge deıin bes kún boıy jyrǵa bólegen baıqaý jyr júırikterin úsh kezeń boıynsha synnan ótkizdi. Jyr dodasyna Respýblıkanyń túkpir-túkpirinen 20-45 jas aralyǵyndaǵy ónerpazdar qatysty. Qatysýshylar ár kezeńde birinshi Qaban jyraýdyń bir jyryn aıtyp, ekinshi óz qalaýy boıynsha jyrlasa, úshinshi kezeńde bılette shyqqan jyrdy tókpeletý talap etildi. Kóp jyrshynyń súrinetin tusy da osy úshinshi kezeń boldy.
Saıysyqa Qazaqstannyń Halyq ártisi, Memlekettik syılyqtyń laýreaty, professor, Qaırat Baıbosynov, sonaý Aqtaýdan kelgen áıgili jyrshy Jetkizgen Seıitov, Syr eli – jyr elinen mádenıettanýshy, Bıdas Rústembekov, Qaban jyraý jyr tókken Jetisý jerinen shaqyrylǵan halyqaralyq «Alash» ádebı syılyǵynyń laýreaty, aqyn, Ámire Árin, Qazaqstannyń eńbek sińirgen qaıratkeri Aıtqalı Jaıymov, Memlekettik «Daryn» jastar syılyǵynyń ıegeri, ánshi Aıgúl Qosanova, sondaı-aq, osy baıqaýdy uıymdastyryp otyrǵan Astana qalasy ákimdiginiń memlekettik akademııalyq fılarmonııasynyń bas dırektory Sáken Ábdirahmanov qazylyq etti.
Baıqaý qorytyndysy shyǵar aldynda uıymdastyrýshylar men qazylar alqasy arnaıy konferensııa ótkizip, jarystyń qalaı ótkeni týraly baıandaýmen birge jýrnalısterdiń suraqtaryna egjeı-tegjeıli jaýap berdi. «Aldymen, artyqshylyqtarynan bastaıyn» degen jyrshy Jetkizgen Seıitov: «Syr eliniń jyrshylary báribir mektep kórgendigin baıqatty. Bárine ortaq kemshilik, jyrdy boıǵa sińirip aıtý jetkiliksiz boldy, onyń sebepteri de joq emes. Burynǵy jyrshylardyń jyr jattap ony el ishinde jyrlaýdan ózge jumysy bolmaǵan ǵoı, shirkin, bularǵa aılyq tólep, aı saıyn esebin surap otyrsa qansha jyrdy jattar edi, boıyna sińire otyryp halyqqa qaıta jetkizer edi. Sosyn bulardyń múmkindigin ashatyn jyr keshteri ótetin bolsa, aqparatty este saqtaýdyń ózi qıynǵa soqqan osy kezeńde bul jyrshylyq dástúrimizge tań qalmaıtyn jurt bolmas edi», - dedi. Al, Aıtqalı Jaıymov bolsa: «Burynǵy jyrshylar jyrlap kelip, arasynda qara sózben de kósiltip-kósiltip alyp ary qaraı jalǵaıdy ǵoı, qazirgi balalar sol qarasózben aıtatyn tusynda kibirtiktep jatyr, ony da dańǵaıyr jyraýlarymyz sekildi kórkem, kósemsózben tógiltip aıtýǵa jattyǵý kerek. Al, uzaq jyrdyń ár bólimin ártúrli sarynmen aıtqan jyrshylardyń talantyna shynymen de tánti boldyq», - dedi. Jýrnalıster saýalyna uıymdastyrýshylar atynan jaýap bergen Sáken Ábdirahmanov bul baıqaýdy budan bylaı eki jylda bir ret ótkizip turý josparlanyp otyrǵanyn jetkizdi. Astana qalasynyń ákimdigi, Astana qalasynyń mádenıet, muraǵattar jáne qujattama basqarmasynyń qoldaýymen ótken ıgi shara elordadaǵy «Astana» konserttik zalynda arnaıy konserttik baǵdarlamamen shymyldyǵyn japty.
Qazylardyń baǵasy boıynsha Bas júlde (2 000 000 tg) astanalyq Aınur Qonysbaevaǵa, I oryn (1 000 000 tg) astanalyq Erbolat Shaldybekovke, II oryn (500 000 tg) qyzylordalyq Marat Súgirbaıǵa, III oryn (250 000 tg) almatylyq Maqpal Toqtaǵanovaǵa buıyrdy. Al Amanjol Daýylbaevqa Asan qaıǵy atyndaǵy arnaıy dıplomy, Juldyz Ysqaqovqa Mádenıet jáne sport basqarmasynyń arnaıy dıplomy tabystaldy. Sondaı-aq, Farhat Orazov, Hasenhan Kishkeneev, Temirbek Asqanbaevtar dıplomant atandy.
Ularbek NURǴALYMULY,
«Egemen Qazaqstan»
