Edvın Blom jańa qyzmetine 1 sáýir kúni resmı kirisken bolatyn. Kompanııa basshysynyń qyzmetine sáttilik tilegen óńir basshysy Qarashyǵanaqty ıgerýshi alıanstpen aradaǵy áriptestiktiń keleshek josparlaryna toqtaldy.
– Elbasymyz Nursultan Ábishulynyń elimizge ınvestısııa tartý boıynsha júrgizip otyrǵan saıasatynyń nátıjesinde 1997 jyldan beri 23 mlrd. dollar ınvestısııa tartyldy. Sonyń ishinde «KPO v.v.» kompanııasynyń jyl saıynǵy negizgi ınvestısııa kólemi 600 mln. dollardy quraıdy. Sońǵy úsh jylda jergilikti qamtý úlesi 47%-dan 54%-ǵa ósti. Byltyr rekordtyq kórsetkish – 32 mln.teńge bólinip, óńirimizde 45 joba júzege asyryldy. Kompanııamen birlesip Bórli aýdanynda ekologııalyq aýmaqta qalǵan Berezovka, Bestaý eldi mekenderiniń turǵyndaryn kóshirý jumystaryn ýaqytyly aıaqtadyq. Sizdiń basshylyǵyńyzben ortaq jumystardy odan ári tabysty túrde jalǵastyramyz degen senimdemin, – dedi Altaı Kólginov.
О́z kezeginde Edvın Blom da Qazaqstan Respýblıkasynyń Prezıdenti Nursultan Nazarbaevtyń sheteldik ınvestısııaǵa barynsha qoldaý kórsetip otyrǵanyn jetkizip, bızneske jaıly klımat qalyptasqan elde kompanııa tabysty jumystar atqaratynyn atap ótti. Sonymen birge Aq Jaıyq óńiriniń áleýmettik ınfraqurylymyn ındýstrıalandyrý, jańǵyrtý jobalaryn birge atqarýǵa daıyn ekendigin bildirdi.
Kezdesýde óńirdegi áleýmettik-ınfraqurylymdyq jobalarǵa jyl saıyn bólinetin qarjy kólemi 20 mln. dollardan 30 mln. dollarǵa ulǵaıatyny aıtyldy. Qazirgi ýaqytta bul kelisim ortalyq memlekettik organdardyń qaraýynda.
Kezdesý sońynda Batys Qazaqstan oblysynyń ákimi kompanııa bastamalary men usynystaryna ákimdik tarapynan qoldaý bolatynyn jetkizdi.
Qazbek QUTTYMURATULY,
«Egemen Qazaqstan»
ORAL
