Sarapshylar men mınıstrlikter ókilderi Akademııa ázirlegen baǵdarlama jobasyna usynystar berip, túzetýler engizdi.
Bilim jáne ǵylym mınıstrlikteri maquldaǵan jaǵdaıda, Akademııa ortaq oqýlyqty ázirleı bastaıdy.
Ortaq oqýlyqty shyǵarý maqsatynda oı almasý úshin búgin Túrki keńesine múshe - Qazaqstan, Qyrǵyzstan, Ázerbaıjan jáne Túrkııa elderiniń ádebıetshi mamandary, BǴM ókilderi men Akademııanyń sarapshylary Astanada bas qosty.
Jıynda sóz bastaǵan Halyqaralyq Túrki akademııasynyń (TWESCO) prezıdenti Darhan Qydyráli búgin oqýlyqtyń ózi emes, baǵdarlamasy talqylanatynyn atap ótti.
«2015 jyly osynda ótken Sammıt kezinde oqýlyqtyń konsepsııasy qabyldandy. Oǵan úlken túrkolog ǵalymdar, ádebıet ınstıtýtynyń dırektorlary qatysqan edi. QR BǴM-de osy konsepsııany maquldady. 2016 jyly biz Baký túrkologııalyq kongresiniń 90 jyldyǵyna oraı ótkizilgen úlken jıynda túrki áleminiń úlken ǵalymdarymen pikir almastyq. 2017 jyly osy oqýlyqtardyń baǵdarlamalaryn taraptarǵa jiberdik. Qazirge deıin Túrkııadan osyǵan baılanysty pikir kelgenimen, basqa elderden naqty usynys bildirgen joq. Usynysty osy jerde otyryp, aıtady degen úmittemiz», - degen TWESCO basshysy Túrki keńesine múshe elderdiń ókilderine sóz berdi.
О́z kezeginde Ázerbaıjannan memlekettik pedagogıkalyq ýnıversıttiń dosenti Bilál Hasanov, Qyrǵyzstan tarapynan Halyqaralyq qyrǵyz-túrik «Manas» ýnıversıteti Shyǵys tilderi bóliminiń meńgerýshisi Osmanakýn Ibraımov, Túrkııadan Ulttyq bilim berý mınıstrligi Eýropa Odaǵy jáne syrtqy baılanystar departamentiniń dırektory Ilhan Aksoı, Qazaqstan tarapynan Y.Altynsarın atyndaǵy Ulttyq bilim akademııasy Orta bilim ınstıtýty dırektorynyń orynbasary Qaıyrjan Rahymjanov jobaǵa biraýyzdan qoldaý bildiretinderin jetkizdi.
«Ortaq túrki ádebıeti oqýlyǵyna qatysty jańalyqqa óte qýanyshtymyz. Bul bizdiń alǵa qaraı bir qadam basqanymyzdyń bir kórsetkishi. Oqýlyq baǵdarlamasynda túrki halyqtarynyń rýhanı, saıası, tarıhı birligi óte tereń kórsetilgen. Oqýlyqtyń baǵyty durys. Ortaq túrki ádebıeti negizi dástúrli ádebıetimizden bastalǵan. Aýyz ádebıeti úlgileri qoıylyp, jazba eskertkishterimiz jáne túrki halyqtarynyń ádebı-kórkem týyndylary da tanytylǵan. Ázerbaıjan Bilim mınıstrliginiń de bul oqýlyqty qoldap otyrǵanyn aıtqym keledi», - dedi Bilál Hasanov.
Jıyn barysynda Túrki keńesine múshe elderdiń barlyq ókilderi «Ortaq túrki ádebıeti» oqýlyǵyn shyǵarýdy tolyǵymen qoldaıtyndaryn jetkizdi.
Kezdesýde Halyqaralyq Túrki akademııasy (TWESCO) ázirlegen túrki álemine ortaq tarıh oqýlyǵy mektep baǵdarlamasyna tańdamaly pán retinde engizilgeni belgili boldy.
«Memleket basshylarymyzdyń tapsyrmasy boıynsha biz Halyqaralyq Túrki akademııasy birneshe jobany qolǵa alǵanbyz. Sonyń biri - «Ortaq túrki ádebıeti» oqýlyǵy. Otyrysty bastamaı turyp sizdermen bir jaqsy habardy bóliskim kelip otyr. Taıaýda ǵana túrki álemine ortaq tarıh oqýlyǵyn ázirlep bitkenbiz. Túrkııa Bilim mınıstrliginen bizge hat keldi. Túrkııa Bilim mınıstrligi biz daıyndaǵan oqýlyqty Túrkııada tańdaýly pán retinde bıyldan bastap kirgizip otyr eken», - dedi TWESCO basshysy. Darhan Qydyráliniń aıtýynsha, Halyqaralyq Túrki akademııasy úshin bul zor qýanysh. «Atalmysh oqýlyq Qazaqstandaǵy Nazarbaev Zııatkerlik mektepterinde oqytyla bastaǵan. Endigi kezekte Túrkııa mektepterine de engizilip otyr. Bizdiń paıymdaýymyzsha, Sammıtte (Túrki tildes elderdiń sammıti - avt.) sheshim qabyldanǵan jaǵdaıda Qyrǵyzstan, Ázerbaıjan jáne Qazaqstandaǵy barlyq mektepterge osy Akademııa ázirlegen oqýlyq engiziletin bolady degen úmittemiz», - dedi Darhan Qydyráli.
Aıta ketsek, Beıbitshilik jáne Kelisim saraıynda ótip jatqan ortaq oqýlyqty talqylaý jıynyna birneshe túrki tildes elderdiń ókilderi qatysyp otyr. Atap aıtqanda, ortaq oqýlyqty talqylaý úshin Ázerbaıjan memlekettik pedagogıkalyq ýnıversıtettiń dosenti Bilál Hasanov, Qyrǵyz Respýblıkasy UǴA múshesi, Halyqaralyq qyrǵyz-túrik «Manas» ýnıversıteti Shyǵys tilderi bóliminiń meńgerýshisi Osmanakýn Ibraımov, Túrkııa Respýblıkasy Ulttyq bilim berý mınıstrligi Eýropa Odaǵy jáne syrtqy baılanystar departamentiniń dırektory Ilhan Aksoı kelgen.
