Qala polısııasy óziniń Twitter-degi mıkroblogynda atalǵan oqıǵanyń saldarynan mert bolǵandar da zardap shekkender de bar ekendigin jazdy jáne qalyń kópshilikti Mıýnster qalasynyń ortalyǵyna barmaı tura turýdy surady.
Spiegel jýrnalynyń jazýynsha, bılik ókilderi bul oqıǵany terakt dep baǵalap otyr. Qylmysker ózin-ózi óltirdi degen de habar bar. Basylymnyń jazýynsha, zardap shekkender sany 50-den asady. Oqıǵadan eki adam qaıtys bolǵan. Mıýnsterdiń ortalyǵyn tártip saqshylary qorshaýǵa alyp, qazir onda keń aýqymdy arnaıy operasııa júrip jatyr. Polısııa halyqty tekserilmegen, jalǵan aqparattardy jeli arqyly taratpaýǵa shaqyryp otyr.
Qazaqstannyń Syrtqy ister mınıstrligi Germanııanyń Mıýnster qalasynda bolǵan oqıǵadan zardap shekkenderdiń arasynda qazaqstandyqtardyń bar-joǵyn tekserip jatyr.
«Biz qazir Germanııanyń ońtústigindegi Mıýnster qalasynda kóliktiń adamdardy basyp ketý oqıǵasynan mert bolǵandar men zardap shekkenderdiń arasynda qazaqstandyq bar ma, joq pa, sol jaǵyn tekserip jatyrmyz. Qazaqstannyń Germanııadaǵy elshiliginiń dıplomattary jergilikti polısııamen tyǵyz baılanysta»,-dep jazdy óziniń Facebook-tegi paraqshasynda SIM-niń baspasóz qyzmetiniń jetekshisi Ánýar Jaınaqov.
