Qazaqstannyń túkpir-túkpirindegi dástúrli ánshi-termeshi, kúıshilerdiń basyn bir arnada toǵystyryp, elimizdiń ár aımaǵynda qalyptasqan óner mektepteriniń tańdaýly týyndylaryn dáripteý maqsatynda uıymdastyrylǵan baıqaý, atadan-balaǵa mura bolyp kele jatqan tól ónerimiz kúı, jyr-termeni damytyp, zamanǵa saı jańashalandyryp, óskeleń urpaqqa nasıhattaýdy kózdeıdi.
Aıta keteıik, Qazaqstan Respýblıkasynyń Aqparat jáne kommýnıkasııalar mınıstriliginiń qoldaýymen «Qazaqstan» RTRK» AQ birlesip 2017 jyly «Men Qazaqpyn» atty halyqaralyq televızııalyq megajobasyn júzege asyrǵan bolatyn.
«Qazaqstan» RTRK AQ Basqarma tóraǵasy Erlan Qarın bıyl, «Men qazaqpyn» jobasyna elimizdiń 14 aımaǵynan, 170 aýdan qatysady dep josparlanyp otyrǵanyn tilge tıek etti.
«Sondaı-aq, ádettegideı sheteldegi qandastarymyzdy tartý úshin Reseıdiń Astrahan, Mońǵolııanyń Baıan-О́lgeı jáne Qyrǵyzstanda uıymdastyrý jumystaryn júrgizetin bolamyz. Bul joba ulttyq tól ónerimizdi damytý ǵana emes, jańa esimder ashýmen qatar, elimizdegi ánshi-termeshiler men kúıshilerdiń ónerin keńinen nasıhattaý», dedi ol.
О́tken jyly, bul aýqymdy jobaǵa 3000-nan astam úmitker ótinish bildirip, oblystyq irikteýge 700-deı adam qatysqan bolatyn. Al, Astanada ótken televızııalyq jobaǵa 57 ónerpaz baq synasyp, ónerlerin ortaǵa saldy. Úsh aıǵa sozylǵan televızııalyq baıqaýda ánshi, kúıshi, termeshilerdiń úzdigin anyqtaýǵa qazylar alqasymen birge kórermender de daýys berý arqyly atsalysty. Osylaısha «Men qazaqpyn» megajobasynyń birinshi maýsymdaǵy shyǵarylymy Táýelsizdik kúni qarsańynda márege jetti. Jeńimpazdardy marapattaý Astana qalasy Ortalyq konsert zalynda ótip, fınalıster jáne óner sheberleriniń qatysýymen gala konsert ótti. Halyqaralyq deńgeıde uıymdastyrylǵan «Men qazaqpyn» mega jobasyna ónerpazdardy tartý úshin shet elderge issapar uıymdastyrylyp, Qytaı, Reseı, Mońǵolııa elderinde turatyn qandastarymyz da ónerlerin kórsetýige múmkindik alǵan bolatyn.
Jıynǵa qatysqan Myrzataı Joldasbekov jahandaný zamanyn da árkimniń shylaýynda ketip qalmaý úshin, derbestigimizdi, ulttyq kodymyzdy, atadan jetken asyl muramyzdy saqtaý kerektigin alǵa tartty.
«Atalǵan jobany uıymdastyrýdaǵy negizgi mindet osy dep esepteımin. Bizdiń bala kezimizde mundaı aqparat quraldary joq. Úlkenderdiń aıtqan ertegi jyrlarymen erjettik. О́z basym Maılyqojanyń ósıetimen óstim dep aıta alamyn. О́ıtkeni aqyl men parasatta, qaıyrymdylyqta sonda», dedi M.Joldasbekov.
Sondaı-aq, joba aıasynda ár óńirdiń tarıhyna, el ishindegi aǵaıynnyń turmys-tirshiligine baılanysty 20 fılm daıyndalyp, efırge shyqqan edi. Aıta keteıik, shyǵarmashylyq ujymnyń eńbegi laıyqty baǵalanyp bıyl ótken «Tumar» Ulttyq televızııalyq baıqaýynda «Úzdik oıyn-saýyq joba» atalymyn jeńip aldy.
Raýan QAIDAR,
«Egemen Qazaqstan»
