Aqordada ótken arnaıy rásimde Elbasyna Reseı Federasııasynyń Tótenshe jáne ókiletti elshisi Alekseı Borodavkın, О́zbekstan Respýblıkasynyń Qazaqstandaǵy Tótenshe jáne ókiletti elshisi Saıdıkram Nııazhodjaev, Túrikmenstannyń Tótenshe jáne ókiletti elshisi Toıly Komekov jáne Italııa Respýblıkasynyń Tótenshe jáne ókiletti elshisi Paskýale D’Avıno senim gramotasyn tapsyrdy.
«Barshańyzdy Qazaqstandaǵy jańa dıplomatııalyq mıssııalaryńyzdyń resmı bastalýymen shyn júrekten quttyqtaımyn. Jaýapty ári mártebeli mindetterińiz elderimiz arasyndaǵy yntymaqtastyqty odan ári nyǵaıtýǵa serpin beredi dep senemin. Sizderdiń dıplomatııalyq qyzmetterińiz mazmundy ári mańyzdy oqıǵalarǵa toly kezeńderde bolǵaly tur», dedi Elbasy saltanatty rásimde.
Memleket basshysy Qazaqstan shırek ǵasyr ishinde dıplomatııalyq júıesi ornyqqan, azamattyq qoǵamy kemeldengen, ekonomıkasy damyǵan memleketke aınalǵanyn basa aıtty. Sondaı-aq elimiz qolǵa alǵan ıgi bastamalardyń túpki maqsaty álemdegi ozyq damyǵan 30 eldiń qatarynda bolý ekendigin atap ótti.
«Qazaqstan halyqaralyq baılanystaryn damyta túsý úshin kópjaqty syrtqy saıası baǵytyn jalǵastyra beretin bolady. Biz beıbitshilik pen qaýipsizdikti, halyqaralyq quqyq negizderin nyǵaıtýdy kózdeıtin is-áreketterdi qoldaımyz. Buǵan Qazaqstannyń BUU Qaýipsizdik Keńesiniń turaqty emes múshesi retinde atqaryp kele jatqan jumystarynyń nátıjesi dálel», dedi Qazaqstan Prezıdenti.
Nursultan Nazarbaev elimizdiń bitimgershilik jumystarǵa belsendi atsalysyp otyrǵanyna nazar aýdaryp, Sırııadaǵy qaqtyǵystardy retteý isinde Astana prosesiniń aıryqsha ról atqaratynyn aıtty. Sonymen qatar Eýrazııalyq ekonomıkalyq odaq, Shanhaı yntymaqtastyq uıymy, TMD jáne Ujymdyq qaýipsizdik týraly shart uıymy sııaqty halyqaralyq uıymdar aıasynda birlese is-qımyl júrgizýdiń mańyzdylyǵyn atap ótti. Memleket basshysy elimizdiń áleýmettik-ekonomıkalyq damý nátıjelerine toqtalyp, Qazaqstanda ınvestısııa tartý úshin qalyptasqan múmkindikter jóninde aıtty.
«Qazaqstan EAEO, ShYU, TMD jáne UQShU arnalaryndaǵy is-qımylǵa erekshe mán beretindigin bilesizder. Elimizdiń syrtqy saıasatyndaǵy óńirlik yntymaqtastyqty nyǵaıtý máseleleriniń máni zor. 2017 jyldyń qorytyndysy boıynsha, Qazaqstan oń ekonomıkalyq kórsetkishterge qol jetkizdi. Ekonomıkalyq jáne ınvestısııalyq yqpaldastyqty nyǵaıtý, sheteldik áriptestermen yntymaqtastyq negizgi baǵyttarymyzdyń biri. Biz saýda-sattyq kólemin ulǵaıtyp, óndiristi órkendetý úshin tıimdi ınvestısııa ákelýge múddelimiz. 2017 jyly Qazaqstan bıznes júrgizý jeńildigi reıtıngi boıynsha 190 eldiń arasynda 36-orynǵa ıe boldy», dedi Nursultan Nazarbaev.
Memleket basshysy sonymen qatar EKSPO-2017 kórmesi barysynda jasyl tehnologııalardy damytý jónindegi halyqaralyq ortalyq pen IT startaptardyń halyqaralyq tehnoparki qurylǵanyn da atap ótti. «Astana halyqaralyq qarjy ortalyǵynyń qyzmetin jandandyrý Qazaqstannyń basty basymdyqtarynyń biri. Osyǵan oraı sizderde halyqaralyq qarjy ortalyǵyn damytýǵa atsalysyp, onyń ıgiligin kórýge shaqyramyz. О́zara tıimdi saýda-ekonomıkalyq yntymaqtastyqty nyǵaıtý úshin Qazaqstandaǵy zor múmkindikterdi keńinen paıdalaný qajet», dedi Memleket basshysy.
Elbasy aǵymdaǵy jyly elimizde birqatar mańyzdy halyqaralyq is-sharalar josparlanyp otyrǵanyna toqtaldy. «Atap aıtqanda, Astana ekonomıkalyq forýmy, Álemdik jáne dástúrli dinder kóshbasshylarynyń VI sezi, Dúnıejúzilik Islam ekonomıkalyq forýmy ótedi. Osy basqosýlarǵa sizderdiń elderińiz belsene qatysady dep oılaımyn», dedi Prezıdent.
Nursultan Nazarbaev budan ári senim gramotalaryn tapsyrǵan elshilerdiń memleketteriniń bizdiń elmen qarym-qatynasyna jeke-jeke toqtalyp, yntymaqtastyq baılanysyn baıandady. Máselen, Qazaqstan men Reseı Federasııasy arasynda qalyptasqan memleketaralyq qarym-qatynastyń joǵary deńgeıde ekenin aıtyp, yntymaqtastyqty odan ári nyǵaıta túsý baǵyty eki el halqy tarapynan keń qoldaý taýyp otyrǵanyn atap ótti. «Qazaqstannyń Reseı Federasııasymen qarym-qatynasy memleketaralyq baılanystyń etalony sanalady jáne strategııalyq seriktestik pen odaqtastyqtyń jarqyn úlgisi retinde qyzmet etedi. Bizdiń tyǵyz yntymaqtastyǵymyzdyń arqasynda Eýrazııalyq ekonomıkalyq odaq ıntegrasııalyq birlestigi tabysty jumys istep tur», dep atap ótti Prezıdent.
Memleket basshysy memleketter arasyndaǵy yntymaqtastyqty odan ári damytýǵa baǵyttalǵan baǵdar eki halyqtyń da barynsha joǵary qoldaýyna ıe bolyp otyrǵandyǵyn basa aıtty. «Men Reseı Prezıdenti Vladımır Vladımırovıch Pýtınmen dostyqqa negizdelgen jeke qarym-qatynasymyzdy joǵary baǵalaımyn. Onyń taıaýda ótken saılaýdaǵy jeńisi – bul Reseı halqynyń eldi odan ári gúldenýi, geosaıası róliniń nyǵaıýy jolyndaǵy óz kóshbasshysynyń baǵdaryna degen eń joǵary kezekti baǵasy, sonymen qatar onyń eline degen sheksiz jan-tánimen berilýi dep esepteımin», dedi Elbasy. Qazaqstan Reseımen aradaǵy ekijaqty formattaǵy jáne halyqaralyq kún tártibi aıasyndaǵy baılanystaryn eki halyqtyń ıgiligi úshin keńeıte berýge nıetti ekendigin aıtty.
Memleket basshysy Nursultan Nazarbaev О́zbekstan Prezıdenti Shavkat Mırzııoevtiń Qazaqstan-О́zbekstan qarym-qatynasyn odan ári nyǵaıtýǵa zor úles qosqanyna toqtaldy. «О́zbekstan Respýblıkasymen bizdi birneshe ǵasyrlyq mádenıetter men dástúrler dostyǵynyń dánekeri baılanystyryp tur. Qazaqstandyq-ózbekstandyq qarym-qatynastyń odan ári damýyna О́zbekstannyń qurmetti prezıdenti Shavkat Mırzııoev úlken úles qosýda. Ol kelgennen keıin biz Astana men Tashkent yntymaqtastyǵynyń jańa jylnamasyn ashtyq. Sonymen qatar Ortalyq Azııa elderiniń yntymaqtastyǵyn nyǵaıtýda aıtarlyqtaı progreske qol jetkizdik», dedi Elbasy. Memleket basshysy aǵymdaǵy jyly bolǵan ózara saparlar, sonymen birge túrli halyqaralyq alańdardaǵy qarqyndy baılanystar saıası rýhty aıtarlyqtaı nyǵaıta túskenin basa aıtty. «Alǵash ret ózara saýda ósimin 30 paıyzdan astamǵa qamtamasyz ettik. Bıyl О́zbekstannyń Qazaqstandaǵy jylynyń bastalýy, kelesi jyly baýyrlas О́zbekstanda Qazaqstan jylyn ótkizý jańa jańalyqtardyń mejesine aınalady jáne bizdiń yntymaqtastyǵymyzdyń barlyq spektrine tyń serpin beredi. Qazaqstan О́zbekstanmen kópjosparly yntymaqtastyqty odan ári nyǵaıtýǵa nıetti», dedi Nursultan Nazarbaev.
Memleket basshysy, sondaı-aq Qazaqstannyń Túrikmenstanmen kópjaqty yntymaqtastyqty odan ári nyǵaıtýǵa nıetti ekenin aıtty. «Búginde Ortalyq Azııadaǵy baýyrlas memleketter – Qazaqstan men Túrikmenstandy tatý kórshilik qatynastar baılanystyrady. Elderimiz arasynda senimdi ári syndarly dıalog ornap, barlyq basty baǵyttar boıynsha ózara túsinistiktiń joǵary deńgeıine qol jetkizildi. 2017 jyldyń sáýir aıyndaǵy Túrikmenstan prezıdenti Gýrbangýly Berdimuhamedovtiń Astanaǵa memlekettik sapary, meniń ótken jyldyń qyrkúıegindegi Ashhabadqa jumys saparym barlyq baǵyttardaǵy memleketaralyq qarym-qatynas tarıhymyzdyń jańa kezeńin ashty», dedi Elbasy. Sonymen qatar Qazaqstan Prezıdenti strategııalyq áriptestik jónindegi shart, Qazaqstan men Túrikmenstan arasyndaǵy memlekettik shekaralardy demarkasııalaý týraly kelisim syndy mańyzdy tarıhı qujattarǵa qol qoıylýy ekijaqty qarym-qatynasty sapaly deńgeıge kótergenin atap ótti.
Qazaqstan Prezıdenti Italııa Respýblıkasymen saýda-ekonomıkalyq baılanystardyń damyp kele jatqanyna erekshe toqtaldy. «Italııa Qazaqstannyń saýda salasyndaǵy áriptesteriniń úzdik úshtigine kiredi jáne bul kórsetkish boıynsha Eýroodaq elderi arasynda birinshi oryn alyp otyr. Sondaı-aq Italııa – elimizdiń ekonomıkasyna qarjy quıyp otyrǵan iri ınvestorlardyń biri. Qazaqstan Italııamen jan-jaqty yntymaqtastyqty, sonyń ishinde ınnovasııalar men ozyq tehnologııalar salasyndaǵy baılanystardy odan ári damytýǵa nıetti», dedi Memleket basshysy.
Sońynda Nursultan Nazarbaev dıplomattardy taǵy da quttyqtap, ekijaqty qarym-qatynastardy nyǵaıtý jolyndaǵy qyzmetterine tabys tiledi.
Dınara BITIK,
«Egemen Qazaqstan»
