Rýhanı jıynda belgili teolog M.Sebasov artynda ǵylym qaldyrǵan birden-bir dinbasy, ári ustaz, ári dáriger Erjan hazirettiń azamattyq bolmysy, eren eńbegi týraly baıandama jasady.
– Erjan Tólegenulynyń birinshi ereksheligi – din men din ókilderin qýdalaǵan keńestik kezeńniń ózinde dástúrli dinniń altyn shynjyryn úzbeı táýelsiz urpaqqa jalǵastyryp ketýshi dáneker. Ekinshi ereksheligi – sońynda hattalǵan mura qalǵan tulǵa. Ol halyqqa tárbıeni, ónegeni tek sózben emes, óziniń júris-turysymen, bolmysymen kórsetip ketti. Tipti ózin tórt ret sottaǵan ókimet týraly bir aýyz sóz teris áńgime aıtpaı, «ókimettiń zańyna baǵyný – ýájip» dep halyqqa nasıhatyn aıta júrip, rýhanı tárbıesin berip ketken dindar, dep toqtaldy M.Sebasov haziret týraly.
Keshege deıin kózden tasa bolyp kelgen qos qoljazbanyń – búgingi halqymen qaıta qaýyshqan qos kitaptyń tusaýyn kesken Serikbaı qajy Orazuly da Erjan hazirettiń qos eńbegi týraly tushymdy pikirlerin aıtyp, joǵary baǵalady.
– Erjan hazirettiń bul eńbekteri, uly murasy bizdiń qandaı mektepti ustanǵandyǵymyzdy aıqyndaıdy. Qos kitapta bizdiń jamaǵatqa beretin jetkilikti ilim bar. Biz jamaǵatymyzdy birizdilikke alyp kelýimiz kerek. Buıryq bolǵan paryzdardyń barlyǵyn sanap, beseýi ıslamda, jeteýi ımanda, on ekisi namazda, tórteýi dárette, úsheýi taıammýmda dep ári qaraı sanap otyryp, bir-aq aýyz sózben túsindirip aıta alǵan. Osy kitaptardyń avtory, ıesi Erjan hazirettiń eńbegi, ásirese «О́sıetnamada» biz úshin, tipti dindarlar úshin ata-babamyzdan kele jatqan dinniń, ilimniń taza, saf qalpyn saqtaǵan, adamnyń boıyndaǵy nápsisin júgendeı alǵan, jan dúnıesin keń, kópshil bola alatyn, jalpy adamnyń qalpyn qalyptastyratyn dúnııa osy kitaptarda aıtylǵan eken. Qos kitap el-halqymyz úshin, musylman jurtshylyǵy úshin baǵdarsham retinde ıgilik-paıdaǵa asa bersin, dep qoljazbanyń urpaq, ult tárbıesindegi alar ornyn aıqyndap berdi.
Jıynǵa hazirettiń qyzy – 83 jastaǵy Nesiphan áje Qyzylsaı aýylynan arnaıy kelip qatysyp, ıgi istiń uıytqysy bolyp júrgenderge alǵysyn jetkizdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
