Qyzyl sý júrgen kezde aýyldyń janyndaǵy shaǵyn ózen tasyp, eldi mekenge alyp barar joldyń bárin shaıyp ótip, turǵyndar «Barsakelmes» aralynda qalǵandaı kúı keshti. Kórshi aýylǵa baryp oqıtyn balalar sabaqtan qalyp, aýyl turǵyndary úshin syrttan azyq-túlik jetkizýdiń ózi muńǵa aınaldy. Qaraǵandyǵa baryp-kelip jumys isteıtinder de amal joq, omalyp úıde otyr. «Aýylda mektepte oqıtyn 27 bala bar. Sý tartylmaıynsha olardy eshqaıda jibermeımiz. О́zennen ótetin kópirdiń ózi sý astynda qaldy. Bizdiń problemaǵa qulaq asatyn adam tabylmaı tur. Jylda kóretinimiz osy», dep muń shaǵady aýyl turǵyny Beıbit Muhammed.
Taıaýda oblys ákimdiginde ótken apparat jıynynda óńir basshysy Erlan Qoshanov Shet aýdanynyń ákimi Marat Jandáýletovti synǵa aldy. «Osy máselelerdi erterek sheshý kerek edi. Bıyl nege Shopada bógen turǵyzbadyńyzdar? Aýdan ákimi uıyqtap júr, búkil eldiń aldynda sózge qaldyq. Aýyldaǵy úılerdiń bári, mine, birneshe kún boldy, syrtqy álemnen bólinip qalǵan», dedi oblys ákimi.
Shopada aýyldyń mańynan ótetin ózenniń sýy arnasynan 30 sm-deı kóterilip, jol ústinen júrip ótken. Oblystyq jolaýshylar kóligi jáne avtomobıl joldary basqarmasynyń basshysy Áskerbek Haltonovtyń aıtýynsha, Shopaǵa deıin tartylǵan 3 shaqyrym jol kópten beri qaraýsyz qalyp kelgen, ábden tozyǵy jetip eskirgen. «Bul jol byltyr Shet aýdanynyń menshigine berildi. Qazir jobalaýshylar joldyń sý ótkizý múmkindigin arttyrý máselelerimen aınalysyp jatyr. Sý ótkizgish qubyrlar sanyn arttyrý týraly sheshim qabyldandy», dep málimdedi ol.
Sonymen qatar atalǵan jıynda oblystaǵy sý tasqynynyń aldyn alý sharalarynyń barysy da jan-jaqty sóz boldy. Búgingi kúnde óńirdegi eń úlken sý qoımasy – Samarqandaǵy sýdyń mólsheri 195 mln tekshe metrdi quraıdy. Sýdyń tolýy 76,7%-ǵa teń. Oblys ákiminiń orynbasary Anatolıı Shkarýpa óńirdegi ózenderdiń tasqyn kezindegi sý mólsherin tolyqtaı ótkize almaıtynyn aıtty. Sol sebepti jol kartasyna ózender arnasyn túzetý boıynsha jumystar engizilgen. «Bul maqsat úshin jobalaý-smetalyq qujattar ázirlendi, jumys bıyl bastalady. Sý joldan asyp ketpeý úshin sý ótkizgish qubyrlardy ornatý jumystaryn aıaqtaý kerek. Bul úshin jol boıyndaǵy osal degen 56 ýchaske anyqtalyp, onyń 13-i boıynsha jumystar atqaryldy. Joldyń qalǵan ýchaskelerindegi qubyr ornatý jumystary bıyl tolyqtaı aıaqtalýy kerek», dep habarlady A.Shkarýpa.
Jıyndy qorytyndylaǵan oblys ákimi týyndaı qalǵan problemalardy taban astynda sheship tastaýdy qatań tapsyrdy.
Qaırat ÁBILDA,
«Egemen Qazaqstan»
Qaraǵandy oblysy
