Dúbirli toıdyń tusaýy Aqan seriniń kindik qany tamǵan ólkeden bastaý aldy. Aqmola men Soltústik Qazaqstan oblystarynyń ǵalymdary men zertteýshileri, qoǵam qaıratkerlerin, buqaralyq aqparat quraldary ókilderi Soltústik Qazaqstan oblysy, Aıyrtaý aýdany, Aqan seri aýylyndaǵy aqynnyń memorıaldyq kesheninde Aqan seri eskertkishine gúl shoqtaryn qoıdy. Sondaı-aq aqyndy eske alyp, onyń shyǵarmashylyǵyn zertteý boıynsha tájirıbe almasty. Jınalǵan qaýym aldynda sóz alǵan Soltústik Qazaqstan oblysynyń qurmetti azamaty, Aıyrtaý aýdandyq ardagerler keńesiniń tóraǵasy Armııa Ábilqaıyrov memorıaldyq keshenniń kóz kórim jerde emes, qalyń toǵaıdyń arasyna salynǵanyna ókinish bildirdi. Sonymen kezinde Reseıdiń Chelıabi ólkesinen kóship kelgen sharýalarǵa jer berý úshin Aqan seri ómirge kelgen aýyl turǵyndaryn malmen aınalysasyńdar degen jeleýmen otyryqshy ornynan qozǵaǵan saıasat ta syn tezine alyndy. О́z kezeginde aqynnyń mol murasy barsha qazaqtyń rýhanı qazynasyna aınalǵandyǵy da aıtyldy.
«Tulǵalar emes, keıingi urpaq usaqtalyp bara jatyrmyz. Biz úshin Abaı, Jambyl, Baýyrjan sııaqty tulǵalar barsha qazaqqa ortaq edi. Sondyqtan da ulttyq qundylyqtarymyzdy nasıhattap, qazaq balasynyń sanasyna sińirý jáne álemdik deńgeıge shyǵarý ýaqyt talaby. Memleket basshysynyń «Bolashaqqa baǵdar: rýhanı jańǵyrý» atty maqalasynda aıtylǵandaı, bizde tamyr da, tarıh ta bar», dedi Jabal Erǵalıev.
Aqan seri memorıalynan keıingi shara Kókshetaý qalasyndaǵy Sh.Qusaıynov atyndaǵy qazaq mýzykalyq drama teatrynda jalǵasyp «Aqan seriniń adalbaqany» atty qysqametrajdy fılm kórsetildi. Fılmde kezinde aqynnyń belgili ustaǵa temirden ılep jasatqan adalbaqany toza bastaǵandyǵy arqyly ómirdiń ótkinshi ekendigin áserli kórsete bilgen.
Máshhúr-Júsip Kópeev kezinde «Aqan seri – zamanynyń suńqary, qyzyl tildiń dilmári, jigittiń qulpy jibegi, sózdiń aǵytylǵan tıegi», dep aıtyp ketkendeı Aqan seriniń áli de ashylmaǵan qyrlary kóp ekendigine kóz jetkizgendeımiz. Sondyqtan da Aqan seri jyrǵa qosqan Aqtoty sulýdyń jıen nemeresi Orynbasar Tókenovanyń qolyndaǵy júzikke eriksiz telmiresiń. Iá bul Aqan seriniń syılaǵan júzigi. Sol mahabbattyń sımvolyna aınalǵan júzikti qolynan bir sát tastamaıtyn Orynbasar apamyz da aıtýly jıynǵa qatysyp, óz estelikterimen bólisti.
Budan keıin Sh.Qusaıynov atyndaǵy qazaq mýzykalyq-drama teatrynyń qoıylymyndaǵy «Aqan seri – Aqtoqty» spektakliniń kórsetilimi boldy. Ǵabıt Músirepovtiń 1941 jyly jazylǵan shyǵarmasynyń jelisi boıynsha jazylǵan pesa sol zamannyń tarıhı shyndyǵyn ashyp kórsetedi. Osydan 20 jyl buryn teatr shymyldyǵy bas rejısser, Qazaqstannyń eńbek sińirgen qaıratkeri Jaqyp Omarov qoıǵan osy spektaklmen ashylǵan bolatyn. Qoıylymnan keıin M.Jumabaev atyndaǵy oblystyq kitaphanada kitapsúıer qaýym Aqan seri ómirine jáne shyǵarmashylyǵyna arnalǵan kitap kórmesin tamashalady. Odan soń shara Úkili Ybyraı atyndaǵy oblystyq fılarmonııada da jalǵasyn tapty. Ádebıet jáne óner murajaıynda «Sal-serilik dástúrdiń saltanaty» atty kórme uıymdastyrylyp, kelýshiler Úkili Ybyraı, Birjan sal, Aqan seri, Balýan Sholaqtyń mýzykalyq aspaptary, sonymen qatar Aqan seriniń jeke zattarynyń kórmesimen tanysty.
Asqar TURAPBAIULY,
«Egemen Qazaqstan»
Aqmola oblysy
