Sybaılas jemqorlyqqa qarsy profılaktıka jumystaryn kúsheıtý, jas urpaq pen barsha qoǵamdy osy dertten aýlaq júrýge shaqyrý, sondaı-aq sybaılas jemqorlyqtyń saldarymen emes, sebebimen kúreske basa mán berý maqsatyndaǵy marafonǵa qatysýshylar óz estafetalaryn Aqtaý teńiz aılaǵynan bastady. Katamaranǵa mingen olardy oqýshylar men stýdentter, jergilikti atqarýshy bılik ókilderi men máslıhat depýtattary kútip aldy.
«Men Aqtaýdy súıemin» jazýynyń qasynda Departament basshysy N.Jannazarova, áıgili sportshy Á.Nııazymbetov, koreı halqynyń «Choson» etnomádenı ortalyǵynyń jetekshisi R.Madenova kópshilik aldynda sóz sóıledi.
Saltanatty sharanyń jalǵasy Túpqaraǵan aýdanynyń Aqshuqyr aýylynda ótti.
Marafonshylardy aýyl turǵyndary qushaq jaıa qarsy aldy. Jas ónerpazdar kúıden shashý shashyp, temir tulparmen jetken aksııa jalaýyn aqbozatpen qabyldap aldy.
Jyl boıyna jalǵasatyn «Adal jol» aksııasy aıasynda barlyq sala qyzmetkerlerimen sybaılas jemqorlyqtyń aldyn alýǵa baǵyttalǵan ártúrli deńgeıdegi sharalar uıymdastyrý josparlanǵan. Al, Túpqaraǵan aýdany aldaǵy ýaqytta estafetany ári qaraı oblystyń ózge aýdandary men qalalaryna joldaıdy.
Respýblıka boıynsha júrip jatqan «Adal jol» aksııasy «9 jeltoqsan – sybaılas jemqorlyqpen kúres kúni» elordada, al oblystyq deńgeıdegi sharalar Aqtaý qalasynda qorytyndylanady.
Mańǵystaý oblysy boıynsha sybaılas jemqorlyqpen kúres agenttigi baspasóz qyzmetiniń habarlaýynsha, bıyl jyl basynan beri óńirimizde «О́ner men mádenıette jemqorlyqqa jol joq» aksııasy da keń kólemde ótken Qalyń buqaranyń qatysýymen uıymdastyrylatyn mundaı jumystar aldaǵy ýaqytta da jalǵasyn tappaq.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
