Baıqaýǵa bir mezgilde jaqyn jáne alys shetelden kelgen 450 joǵary synyp oqýshysy qatysýda. Dodanyń qatysýshylary 7 túrli negizgi kategorııadan: robototehnıka, kompıýterlik baǵdarlamalaý, kompıýterlik grafıka jáne óner, qysqa metrajdy fılmder, apparattyq basqarý júıeleri, drondyq jarystar jáne matematıkalyq jobalar boıynsha kúsh synasýda.
- Búgingi is-sharanyń aýqymdylyǵyna berer baǵa sheksiz. Birneshe jyldar boıy jobanyń ónertapqyshtar arasynda mańyzdylyǵy tek ǵana artýda. Arnaıy jobalar kórmesiniń deńgeıi otandyq jáne halyqaralyq sarapshylardan joǵary baǵaǵa ıe boldy. Ásirese bıylǵy jyly elimizde «Sıfrly Qazaqstan» memlekettik jobasynyń qolǵa alynýymen tuspa-tus kelýi – biz úshin óte mańyzdy. INFOMATRIX-ASIA – SDÝ úshin jyldan jylǵa erekshe dástúrge aınalýda. 2013 jyly jobada 13 memleketten 190 ónertapqysh qatyssa, bıylǵy jyly 15 memleketten 450 jasóspirim qatysýda. Jobanyń basty seriktesteri – «Daryn» Respýblıkalyq ǵylymı-tájirıbelik ortalyǵy men QR BǴM alǵysym sheksiz, - dep lebiz bildirdi saltanatty is-sharada SDÝ prezıdenti Meıirbek Májıtov.
Uıymdastyrýshylardyń aıtýynsha, baıqaýdyń maqsaty – aqparattyq tehnologııalar salasyndaǵy sheberlikti shyńdaý, túrli memleketten joǵary synyp oqýshylary men oqytýshylaryn biriktirip, ultaralyq qatynastardy nyǵaıtý, sonymen qosa memleket mártebesin álemdik aqparattyq keńistikte asqaqtatýǵa baǵyttalǵan.
Baıqaý kórmesinde ónertapqyshtar san túrli jobalaryn kópshilik nazaryna usynǵan. Asa shyǵarmashylyq tapqyrlyǵymen erekshelengen jobalar zamanaýı qoǵamda qarqyndy damyp kele jatqan robototehnıka baǵytynan, sonymen qatar qoǵamdaǵy sýısıd, qorshaǵan ortany qorǵaý, úlkenge degen qurmet, shynshyldyq syndy ózekti taqyryptarǵa túsirilgen qysqa metrajdy fılmdermen erekshelendi. Top jaryp úzdik atanǵan joba avtorlary 15-sáýirde iriktelip, oqý ornynyń 100% grantymen marapattalady. Sonymen qatar 4 jyl boıy ýnıversıtettiń Injenerlik jáne jaratylystaný fakýltetinde tegin bilim alýǵa múmkindik alady.
