«Búgingi tańda «KATEK» JShS jobalyq uıymyna magıstraldyq gaz qubyrynyń ótý trassasy boıynsha barlyq ruqsat qujattary berildi. Energııa berýshi kásiporyndarǵa magıstraldyq gaz qubyrynyń jabdyqtaryn elektrtaratý jelisine qosý boıynsha tehnıkalyq sharttar berildi», - dep málimdedi Qaırat Begimov.
Aımaqta jobany iske asyrýǵa qatysty basqa da máseleler sheshilip jatyr. 2020 jylǵa deıin oblysta ortalyq jylytý júıesi joq kósheler men yqshamaýdandardy qosymsha qamtıtyn úsh avtomattandyrylǵan gaz taratý stansııalarynan jetkizýshi jáne oramdyq jelilerdiń qurylysy josparlanyp otyr. «Qaraǵandy» AGTS-nan jalpy eseptegende 5,5 myńnan astam jeke sektorlardaǵy úıleri bar Qaraǵandy men Saran qalalaryn gazben qamtý josparlanyp otyr. Temirtaýǵa keler bolsaq, 3 myń jeke sektor úıleri ortalyqtandyrylǵan gazben qamatamasyz etiletin bolady. Jezqazǵanda 2,5 myń jeke úılerdi gazben qamtamasyz etý kózdelip otyr», - dep naqtylady basqarma basshysy. Esepteýler boıynsha, birinshi kezekte kógildir otyndy oblystyń shamamen 65 myń turǵyny jáne 1400 zańdy tulǵalary alady. Bir jyldyq tutyný kólemi 85 mln m3 gazdy quraıdy.
«Birinshi kezeńdegi taratý jelileri qurylysynyń boljamaly quny - 21,4 mlrd teńge. Oblystyq bıýdjetti naqtylaýǵa JSQ daıyndaýǵa bıýdjettik ótinim berildi», - dedi Qaırat Begimov. «JSQ daıyndaýǵa baıqaý mamyrda jarııalanady. Shildede jobany qurýdy bastap, jeltoqsanǵa deıin aıaqtaýdy josparlap otyrmyz. Gaz taratý jelileriniń qurylysy jospar boıynsha 2019-shy jyly bastalady». Oblys ákimi Erlan Qoshanov bul jumystardyń Jol kartasyn qurýdy tapsyrdy. «Magıstraldyq gaz qubyrynyń qurylysy aıaqtalǵanǵa deıin gaz taratý jelileri daıyn bolýy tıis», - dep atap aıtty aımaq basshysy.
