- Búginnen bastap maýsym aıyna sheıin ár senbi saıyn qalamyzda osyndaı senbilik ótetin bolady. Maqsatymyz – qalany aldaǵy meıramdarǵa, jaz aılaryna daıyndaý. Búgin birinshi senbilik negizinen qalany sanıtarlyq tazalaýǵa arnalǵan. Sondaı-aq 120 túp shyrsha otyrǵyzamyz. Al kelesi senbi, 21 sáýir – búkil Qazaqstan boıynsha terek otyrǵyzý kúni bolyp jarııalandy.
Buıyrsa bir aıdyń ishinde Oral qalasynda 10 myń túp kóshet otyrǵyzamyz. Onyń 2 myń túbi – qalalyq ákimdik otyrǵyzady. Qalǵan 8 myńyn – qala turǵyndary, jeke kásipkerler, PIK mekemeleri egedi, - deıdi Oral qalasy ákiminiń orynbasary Altynbek Qaısaǵalıev. Qalaǵa sán bertin saıabaqtarǵa, jol jıekterine, alańqaılarǵa otyrǵyzý úshin aǵashtyń alty túri – shyrsha, úıeńki, akasııa, sıren, terek, qaraǵash kóshetteri tańdap alynǵan.
Qalalyq ákimdik ókiliniń aıtýynsha, Oral qalasynda kóktemgi sý tasqyny qaýpi seıilgen. Biraq oblys ortalyǵyn aınalyp aǵyp jatqan Derkúl, Shaǵan, Jaıyq ózenderinde endi-endi seń júrip, sý deıgeıi kóterilip jatyr. «Sý deńgeıi tómendep, ózender óz tańǵaryna túsken soń jaǵalaýlardy tazalaý jumysyn bastaımyz» Bul maýsym aıyna josparlanǵan» deıdi Altynbek Keńesuly.
Belgilengen tártip boıynsha árbir mekeme menshik túrine qaramastan óz ǵımaratynyń aınalasyn 5 metrge deıin taza ustaýy, abattandyrýy, aǵash, gúl otyrǵyzýy, vıtrınalary men terezelerin jýyp, taza ustaýy talap etiledi.
Jańa shyrsha kóshetteri otyrǵyzylǵan Murat Móńkeuly kóshesindegi ádemi múıiske – «Alash alleıasy» ataýy beriletindigi jóninde osydan birneshe jyl buryn habarlanǵan bolatyn. «Iá, ondaı jospar boldy, biraq áli resmı bekitilgen joq. Qazir bul másele onomastıkalyq komıssııa qaraýynda» dedi Altynbek Qaısaǵalıev.
Oral qalasynyń tazalyǵyn saqtaý, kóshetter men gúlder otyrǵyzý, abattandyrý jumystaryna 2018 jyly 140 mln. teńge josparlanǵan.
Qazbek QUTTYMURATULY,
«Egemen Qazaqstan»
Oral qalasy
Sýretti túsirgen Temirbolat TOQMÁMBETOV
