Atalǵan baıqaýǵa Áýlıeatanyń árbir aýdanynan qatysýshy ujymdar talap boıynsha eki qoıylymnan sahnalady. Qordaı, Shý, Jýaly jáne Talas aýdandarynyń qoıǵan «Taqtalas», «Soqyrishektegi «Volga», «Ájeniń áldıi», «Arandatqyshtar» qoıylymdary kópshilik kóńilinen shyqty. Atalǵan qoıylymdar mazmunynyń tereńdigimen de, ıdeıasynyń beriktigimen de kópshilik kózaıymyna aınaldy. Máselen, Talas aýdanynyń ónerpazdary sahnalaǵan «Arandatqyshtar» qoıylymyndaǵy keıipkerler Sýsyn baba, Sút ananyń beıneleri men olardan taraǵan Qymyz, Shubat, Saýmal, Aıran «batyrlardyń» obrazdary Araq, Sharap, Temeki beınelerin tutqyndaýy arqyly ulttyq dástúrdi nasıhattaýy, jastardy zııandy nárselerden bas tartýǵa úndeý ıdeıalary kópshilikke oı saldy.
Nátıjesinde «Kúlemiz be?» atty oblystyq ázil-syqaq baıqaýynyń bas júldesin Talas aýdanynyń ónerpazdary jeńip aldy. Sondaı-aq birinshi oryndy M.H.Dýlatı atyndaǵy Taraz memlekettik ýnıversıtetiniń stýdentteri ıelense, ekinshi oryn Jýaly aýdanynyń ónerpazdaryna buıyrdy. Al shýlyqtar úshinshi orynnan kórinse, «Kórermender kózaıymy» atalymy Qordaı aýdanynan kelgen ónerpazdarǵa berildi. Sonymen qatar Shona Smahanuly atyndaǵy arnaıy syılyqty Merki aýdanynyń ónerpazdary ıelendi.
Hamıt ESAMAN,
«Egemen Qazaqstan»
Jambyl oblysy
