Batys Qazaqstan, Atyraý, Aqtóbe, Mańǵystaý oblystarynda irikteý saıystarynan ótken 21 qarııa baıqaýǵa qatysyp, baq synady. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Atyraý oblysy ákimdigi, oblystyq mádenıet, arhıvter jáne qujattama basqarmasy, «Ardagerler uıymy» respýblıkalyq qoǵamynyń oblystyq fılıaly, oblystyq tarıhı-ólketaný mýzeıi uıymdastyrǵan shara «Batamen el kógerer» dep ataldy.
– Saıysqa qatysýshylar «El esindegi batalar» taqyrybyndaǵy birinshi kezeńde tarıhta attary qalǵan tulǵalardyń batalaryn aıtty. Ulttyq salt-dástúrlerge baılanysty saýaldarǵa jaýap berip, bilgenderimen bólisti. Sharany tamashalaýǵa jastar kóp jınaldy, – deıdi oblystyq tarıhı-ólketaný mýzeıiniń basshysy Rashıda Harıpova.
Batagóı qarııalardyń ónerin tarıh ǵylymdarynyń doktory, «Ardagerler uıymy» respýblıkalyq qoǵamdyq birlestigi tóraǵasynyń birinshi orynbasary О́mirzaq Ozǵanbaev bastaǵan qazylar alqasy baǵalady. Bas júldeni Batys Qazaqstan oblysynyń atynan qatysqan Ertaı Serdalın jeńip aldy. Birinshi oryndy atyraýlyq Ýahıt Ádilov ıelendi. Barlyq júldegerlerge arnaıy syılyqtar tabystaldy. Shara barysynda, sondaı-aq «Batamen el kógerer» atty jańa kitaptyń tusaýkeser rásimi jasaldy.
Baqytgúl BABASh,
«Egemen Qazaqstan»
ATYRAÝ
