Oqýshylar men kolledj stýdentterine arnalyp ótkizilip otyrǵan tuńǵysh startaptar baıqaýyn Aqtaý qalasyndaǵy hımııa-bıologııa baǵytyndaǵy Nazarbaev Zııatkerlik mektebi men Mańǵystaý oblystyq bilim basqarmasy uıymdastyrdy. Baıqaýdyń basty maqsaty – oqýshylar men stýdentter arasynda jańa jobalardy tanystyrý alańyn qurý, ınnovasııalyq birlestiktiń áleýetin kórsetip, ony qoldaý.
Jarysqa qatysýda belsendilik tanytyp, bıznes bastaýdy oılaıtyn oqýshylar men stýdentterdiń kóp ekendigine qýanyshtymyz. Osyndaı kásipkerlikke beıimi bar jastardy qoldap, olarǵa kásipkerler men sarapshylar kómegimen baǵyt-baǵdar kórsetip, jobasy bıznes bastaýǵa tıimdi bolyp jatsa, kásipkerlermen tildesýge jaǵdaı jasaýdy josparlap otyrmyz, deıdi Aqtaý qalasyndaǵy Nazarbaev Zııatkerlik mektebiniń dırektory Ermek Paızov.
Irikteý kezeńine Mańǵystaý oblysynyń aýdandarynan, Atyraý oblysynan, tipti Astana qalasynan qatysýshylar keldi. Qatysýshylar kásipkerler men startap saıystardyń jeńimpazdarynan quralǵan táýelsiz qazylar alqasynyń aldynda jobasynyń kreatıvtiligi men aktýaldiligi týraly 2 mınýt kóleminde baıandap berdi.
Saıys úsh kezeńnen turady. Jobaǵa qatysýshy eń aldymen bastaǵysy keletin bıznes týraly eki mınýttyq vıdeo túsirýi tıis. Sodan soń jobanyń mańyzdylyǵy, suranysy, tıimdiligi týraly prezentasııa daıyndady. Qazylar alqasy Nazarbaev Zııatkerlik mektebine kelgen jobalardyń ishinen eń úzdik 20 jobany tańdap, aqtyq kezeńge joldady. Irikteýden ótken qatysýshylar 21- sáýirde bıznes-jobalaryn kásipkerler men qazylar alqasynyń aldynda qorǵaıtyn bolady. Baıqaýdyń jeńimpazyna 300 myń teńge beriledi. Al, II orynǵa - 250 myń, III orynǵa - 200 myń teńge qarastyrylǵan.
Startap jobalar baıqaýynyń bas demeýshisi - «Forte bank» AQ Mańǵystaý oblysyndaǵy fılıaly men «MKS Logistics» JShS. Al «Atameken» kásipkerler palatasynyń Mańǵystaý oblystyq fılıaly, «Mediana» IT-kompanııasy, «Jas Otan» jastar partııasy, «Mangystau» telearnasy jáne «Inaktau.kz» qalalyq aqparattyq portaly baıqaý seriktesteri.
Sonymen qatar, irikteýden ótken 20 jobanyń qatysýshylaryna «Atameken» UKP bıznes-treneri Nurdaýlet Medeýov, «Mr.President» sheshendik sóıleý akademııasynyń jetekshisi Qaırat Hasanov jáne «Like» ortalyǵynyń Aqtaýdaǵy ókili Bekjan Shoqanov kásipkerlik negizderi, ınvestorlarmen jumys taqyrybyna arnaıy sheberlik saǵattaryn ótkizdi.
Gúlaıym ShYNTEMIRQYZY,
«Egemen Qazaqstan»
