Ońtústik Qazaqstan oblysynyń ákimi J.Túımebaev túsirilim tobymen kezdesýinde tarıhı serıaldyń urpaq tárbıesindegi mańyzdylyǵy men Ońtústik óńiriniń tarıhı mánine toqtaldy. Basqosýǵa týyndynyń qoıýshy-rejısseri Rústem Ábdirashev, bas prodıýser Arman Asenov bastaǵan shyǵarmashylyq top qatysty. Fılmniń qoıýshy-rejısseri Rústem Jarasqanuly kezdesý barysynda tarıhı shyǵarmanyń óńirdegi túsirilimine qoldaý kórsetý qajettigin jetkizdi. Bul oraıda oblys ákimi kıiz úıler, at, kóne dekorasııalar, medısınalyq jáne qaýipsizdik syndy kómektiń barlyǵy jasalynatynyn jetkizdi. Tıisti sala, mekeme basshylaryna tapsyrma berdi.
«Degenmen kınodan osy óńirdiń talantty ártisterin de kórgimiz keledi. Munda kásibı deńgeıdegi óner adamdary jetkilikti. Atalǵan fılmge jergilikti ártisterdi qatystyrýdy usynamyn», - dedi J.Túımebaev.
Týyndynyń Ońtústiktegi túsirilimi 25 sáýirden 4 shildege deıin jalǵasady. Túlkibas, Tóle bı aýdandary men Arys, Aqsý ózenderiniń boıynda jáne Túrkistan qalasyndaǵy «Áziret Sultan» memlekettik tarıhı-mádenı qoryq-murajaıynda «Kereı hannyń aýyly», «Han ordasy» syndy dekorasııalar jasalynbaq.
Aıta ketelik, "Qazaq Eli" kórkem serııasynyń jobasy Elbasy N.Nazarbaevtyń bastamasymen Qazaq handyǵynyń 550 jyldyǵyna oraı qolǵa alynǵan bolatyn. Fılmde qazaq handyǵynyń qazyǵyn qaqqan Kereı men Jánibek tusyndaǵy XV ǵasyrdaǵy kóshpendi qazaq mádenıeti sıpattalady. Alǵashqyda Rústem Ábdirashev fılmniń 20 serııasyn birden túsirgisi keldi. Alaıda qarjy jetpeýine baılanysty 10 serııasy keıinge qaldyrylǵan-dy. Degenmen sol kezde qalǵan on serııanyń birazy túsirilip úlgerilgeni de aıtylǵan bolatyn.
Erkin DOSYMBAI,
Ońtústik Qazaqstan oblysy
