Basqosýǵa fılologııa ǵylymdarynyń doktory Amantaı Shárip, jýrnalıst Qanat Áýesbaı, О́zbek mádenı ortalyǵynyń tóraǵasy Sherzod Pýlatov, sondaı-aq Qazaqstan halqy Assambleıasynyń (QHA) ózge de músheleri, stýdentter, «Qazaqstannyń 100 jańa esimi» jobasynyń jeńimpazdary qatysty.
– «Erkin sóıle» nekonferensııasy – QHA-nyń biregeı bastamasy. Ol «Rýhanı jańǵyrý» baǵdarlamasynyń álemniń 100 úzdik kitabyn aýdarý aıasynda jáne QHA-nyń kezekti sessııasy men Qazaqstan halqynyń birligi kúni qarsańynda ótip jatyr. «100 jańa oqýlyq» jobasynyń qatysýshylary aýdarylǵan kitaptardy tanystyrady. Al talqylaýdyń ereksheligi – jastardy tyńdaý, olardyń pikirine qulaq túrý jáne qajet aqparatpen bólisý. Budan bólek, nekonferensııada qazirgi qoǵamdaǵy ózekti máseleler de talqylanady, – dedi «Ahyska» túrik mádenı ortalyǵynyń tóraǵasy Ásker Pırıev.
12 sáýirde Qazaqstan Prezıdenti Nursultan Nazarbaevtyń qatysýymen «Qazaq tilindegi 100 jańa oqýlyq» jobasy aıasynda aýdarylǵan alǵashqy 18 kitaptyń tanystyrylymy ótkeni belgili. Bul kezdesýde sol kitaptardyń biri – brıtandyq oıshyl Karem Armstrongtyń «Iýdaızm, hrıstıandyq pen ıslamdaǵy 4000 jyldyq izdenis: Qudaıtaný baıany» atty kitabynyń aýdarmasy keńinen túsindirildi. Kitaptyń aýdarylýyna jáne redaksııalanýyna atsalysqan ǵalym Amantaı Shárip atalǵan kitaptyń tarıhy jaıly qysqasha aıtyp berdi.
– Osyǵan deıin Karen Armstrongtyń 11 kitaby orys tiline aýdarylǵan eken. Onyń bári dúnıe júzine tanymal. Osy tusta «Ulttyq aýdarma bıýrosy» kóptegen jaıtty negizge ala otyryp, Armstrongtyń búkil shyǵarmasynyń uıytqysy bolǵan «Qudaıtaný tarıhy» kitabyna toqtaldy. Bul kitapty teologııanyń nemese fılosofııanyń aýqymyna shektep qoıýǵa bolmaıdy. Munda adamzattyń basyn biriktirýge umtylatyn ıdeıalar kórsetilgen. Al dinderdiń tarıhyn zerttegende bir-birinen bólektemeı, sabaqtas ekenin aıta kelip, jurttyń bir Jaratýshyny tanýǵa degen izdenisterin baıandaǵan, – dedi Amantaı Shárip.
О́z sózinde ol brıtandyq oıshyldyń týyndysyn birlikke, toleranttyqqa, ózara túsinistikke shaqyratyn kitap degen oıyn bildirdi. Ǵylymı tanymdyq kitap aldaǵy ýaqytta gýmanıtarlyq mamandyqta oqıtyn stýdentterdiń oqý quralyna aınalmaq. Budan bólek ol aýdarma barysynda tap bolǵan qıyndyqtar jaıly aıtyp ótti. Shyǵarmadaǵy bir tirkesti uǵynyqty ári yńǵaıly etip aýdarý úshin bir kúni ketkenin jetkizdi.
Al pikiralmasý bóliginde qatysýshylar din salasyndaǵy bilimsizdikten bolatyn keleńsizdikter jaıly oılaryn bildirip, radıkaldy baǵyttaǵy uıymdardyń jastardy qalaı azǵyratynyn ári olardan qalaı saqtaný kerektigin talqylady.
Aıan ÁBDÝÁLI,
«Egemen Qazaqstan»
