Qoıylymdardy tamashalaýǵa kóptegen kórermen keldi. Qurmetti qonaqtardyń arasynda Qyzyl teńiz provınsııasynyń gýbernatory, Qazaqstan dostary assosıasııasynyń tóraǵasy Ahmed Abdalla, Ońtústik Sınaı provınsııasynyń gýbernatory Haled Foda, Aleksandrııa provınsııasynyń gýbernatory Muhammed Sultan, Mysyr mınıstrlikteri men vedomstvolarynyń basshylary, shetelderdiń elshileri men dıplomattary keldi. Olar dástúrli jáne zamanaýı mýzykalyq ónerdi qamtıtyn qazaq ulttyq mádenıetiniń qaıtalanbas sıntezine nazar aýdara otyryp, qazaqstandyq ártisterdiń kásibı deńgeıin joǵary baǵalady.
Mysyrlyq kórermenderdiń nazaryna Vagnerdiń ývertıýrasy, Nıýrbnerg Meısterzınger operasy, Prokofevtiń birinshi skrıpka konserti, Shýberttiń toǵyzynshy sımfonııasy sııaqty álemdik klassıkanyń aldyńǵy qatarly shyǵarmalary usynyldy. Bizdiń jas jáne talantty kompozıtor, «Qazaq Mosarty» atanǵan Rahat-bı Ábdisaǵınniń «Romantızm jańǵyryǵy» atty shyǵarmasy erekshe qyzyǵýshylyq týdyrdy. Sonymen qatar «Shabyt» dombyrashylar ansambliniń «Adaı», «Álqıssa» kúılerin asqan sheberlikpen oryndaýy, «Aıgólek» skrıpkashylar ansambli, sondaı-aq ánshiler Batyrjan Smakov, Asqar Muqııat, Ulpan Ábdikárimova, Nazym Saǵyntaı, Marat Aıtymbaıdyń ónerleri jurtshylyqty qýantty.
Osy kúnderi Qazaqstannyń Kaırdegi elshiligi uıymdastyrǵan is-sharalarǵa Mysyrda turatyn otandastarymyz jáne qazaqstandyq stýdentter qatysyp, týǵan jer áýenderin tyńdady. Konsert sońynda olar elshiliktiń qyzmetkerleri men ártisterge keremet is-shara úshin alǵystaryn bildirdi. Olardyń aıtýynsha, Elbasynyń «Rýhanı jańǵyrý» baǵdarlamasy qazaqstandyqtardyń ulttyq ónerge atsalysýyna ǵana emes, sheteldikterdi Otanymyzdyń kópqyrly mádenıetimen tanystyrýǵa da úlken múmkindik beredi.
«Egemen-aqparat»
