Qaıran Ahań qazaqtyń kóne saltyn sarsha tamyzdyń sary qymyzyndaı ańsaýshy edi. Ár sózi seleýli dalanyń aq buıra tolqynyndaı qulaqqa kúı bolyp enip, eńseli tulǵasy men quımaly kúmis shaqshasy, qıyrdy sholyp qaraıtyn qyran qabaǵy, kere qarys jazyq mańdaıy, kóneniń kósem salyndaı mańǵaz júrisi qandaı edi...
Hosh sonymen... qazaqtyń basynan baǵy taıyp, bodandyqqa bas ıgen HIH ǵasyrdyń orta tusynda Sarysý-Túgesken boıyn jaılap jatqan bes meıramnyń biri qýandyq elinde Qutjan degen qajy ótipti.
Birde Qutjekeń eldiń ekinshi bir iri shonjary Baqa batyrmen bolymsyz oqıǵa úshin sharpysyp qalyp, kıkiljiń sozylmaly dertteı jazyla qoımapty.
Sol jyldary elde bolystyq saılaý ótip, Qutjekeń óz atyn usynady. Qyzyq bolǵanda bul kisiniń kandıdatýrasyn Aqmoladaǵy oıaz bekitpeı tastapty. Tektep kórse, bir qýlar araǵa adam salyp, tilmash arqyly oıazdyń jemsaýyn toltyryp tastaǵan.
Jaǵdaıǵa qanyqqan Baqa batyr beline qanjaryn baılap, bes qarýyn asynyp oıazdyń keńsesine basyp kirip: «Býnt býdet... býnt býdet» dep aǵash edendi naızanyń dúmimen soqylaıdy. Oıazǵa da jan kerek onyń ústine «býnt» degen jaqsy dúnıe emes. Dereý máseleni jaımashýaq talqylap, ana alaıaqty shaqyryp alyp, parasyn ózine berip, Qutjannyń jolyn ashady.
Sóıtip kóńili jaılanǵan jurt jaý túsirgendeı jaırańdap elderine qaıtady. Sózdiń reti kelgende bir azamat Baqa batyrǵa «Ýa, batyr, bizge mynany túsindirińizshi. Siz Qutjanmen araz emessiz be? Endi mine, sol baqtalasyńyz úshin ata jaý oıazdy toqpaqtadyńyz? Ne sebepten Qutjannyń jyrtysyn jyrta qaldyńyz?».
Sonda batyr qatýlanyp: «О́ı, shirik neme, Qutjanmen men arazbyn, biraq namysym araz emes, sony da túsinbeısińder me! Bul jerde eldiń namysy ketip bara jatqan joq pa?» dep, qasyndaǵy qaptaǵan atqosshylaryna alaıyp bir qarap, sonaý kóz ushynda munarlanyp turǵan Imanaq taýyn betke alyp tartyp otyrypty.
Beken QAIRATULY,
«Egemen Qazaqstan»
