Oblys ortalyǵyndaǵy Dostyq úıi «Qoǵamdyq kelisim» ortalyǵynda sheshen-ıngýsh mádenı ortalyǵy konsert berdi. Bul konsert alda kele jatqan 1 -mamyr Qazaqstan halqy birligi kúnine arnaldy. Týǵan jer Qazaqstanǵa arnalǵan óleńder shyrqaldy, vaınah halqynyń áserli bıleri oryndaldy. Ortalyqtaǵy Jańǵyrý mektebi men «Halkıan Bart» oblystyq sheshen-ıngýsh mádenı ortalyǵy óz tilderin, ulttyq salt-dástúrlerin umytpaı, elimizdegi halyqtyń birligin arttyrýǵa, memlekettik ulttyq saıasattyń jandanýyna óz úlesterin qosyp keledi.
Merekeni «Halkan Bart» oblystyq sheshen-ıngýsh etnomádenı birlestigi uıymdastyrdy. Qonaqtarǵa qyzyqty ári kóńildi baǵdarlama usynyldy. Festıvaldi «Illı» ansambili «Otan» ánimen ashty. Sondaı-aq bul top «Moı Kazahstan», «Chegardıg», «Alǵa» jáne «Nash Kavkaz» ánderin oryndady.
Ulttyq sıpatty aıqyn kórsetetin, tákappar jáne aıbyndy bı – kavkaz lezgınkasyn búkil álem tanıdy jáne súısinedi. Is-shara sheńberinde «Shovda» bı ansambli qonaqtarǵa arnap «Qyzdar bıin» oryndady. Sonymen qatar, «Lovzar» jáne «Deımohk» bı ansambilderi vaınah halyqtyq bılerin oryndady.
Sheshen-ıngýsh etno-mádenı ortalyǵy balalar men jastardyń tárbıesine basa nazar aýdarady. Sondyqtan, «Ulttyq jańǵyrý mektebine» ul-qyzdary kelip úlkenderden kóp qajetti tanymdyq jaılardy úırenedi. Mektepte balalarǵa halyq mádenıetin, ádet-ǵuryptaryn, tilin meńgerýlerine jaǵdaı jasalǵan, balalardy tatý ómir súrýge, bir-birin syılaýǵa úıretedi. Mekteptiń ul-qyzdary barlyq jetistikterin balalar mektep, qala, oblys deńgeıindegi túrli mádenı-buqaralyq is-sharalarynda halyq nazaryna usynady.
Farıda Byqaı,
«Egemen Qazaqstan»
Pavlodar
Sýretti túsirgen Maqsat Aıtbaev
