Batyr qyzdyń eskertkishi 3,6 metrlik, tuǵyrymen qosqanda bıiktigi 6 metrden asady. Jergilikti mamandar men Mádenıet mınıstrligi ókilderinen quralǵan komıssııanyń talqysynan ótip tańdalǵan eskertkish jobasynyń avtory – belgili músinshi Murat Mansurov. Qadyrbolat Qabdyrulynyń aıtýynsha, músinniń jalpy jobasy daıyn, óńirdiń ókilderi eskertkish daıyndalyp jatqan sehqa arnaıy baryp, sheberlerdiń jumys barysyn qadaǵalap, sońǵy eskertý-usynystaryn bildirgen.
- Bul eskertkish Astanadaǵy Jeńis dańǵyly boıynda ornatylady, aınalasynda halyq kelip, demalatyn arnaıy skver bolady. Ol alańqaıǵa oryndyqtar ornatyp, abattandyrýdy da ózimiz qolǵa alamyz, - dedi Q.Musaǵalıev.
Kezdesýde eskertkish jobasymen tanysqan zııaly qaýym ókilderi ózderiniń keıbir usynys-pikirin bildirdi. Mánshúktiń budan buryn ornatylǵan eskertkishterinde Maksım pýlemeti qosa beınelense, bul joly ol element joq. Iаǵnı, batyr qyz jelbegeı jamylǵan shınelin qos qolymen qymtap, oń aıaǵyn sál alǵa basyp oılanyp tur. Áskerı kıimi bolmasa, mamyrajaı beıbit boıjetkennen aıyrmasy joq. «Jalpy álemdik úrdiste eskertkishterge qarý beıneleý – soǵystyń, agressııanyń jarnamasyndaı qabyldanady. Sondyqtan avtorlar Mánshúkti urys arasyndaǵy tynysh sátinde, barynsha beıbit qalypta beıneleýge tyrysqan. Bul osy jerge demalýǵa keletin Astana jurtshylyǵynyń da kóńilinen shyǵar degen oıdamyz» deıdi Q.Musaǵalıev.
Osy jobanyń basy-qasynda júrgen sarapshynyń biri, Oral qalasyndaǵy M.Mámetova atyndaǵy memorıaldyq mýzeı-úıiniń dırektory Svetlana Bektenova eskertkishtiń bet-júzi batyr qyzdyń osy kezge deıin saqtalǵan sýretterine barynsha sáıkes jasalǵanyn aıtady.
Batys Qazaqstan oblysy osydan 10 jyl buryn, Astananyń 10 jyldyǵyna oraı Elordaǵa «Astananyń qurdasy» atty kompozısııalyq keshen syıǵa tartqan bolatyn. Batysqazaqstandyq sýretshi Erǵalı Bekeshovtyń bul týyndysynda qazaqy úıdiń terezesine súıengen 10 jasar baldyrǵan beınelengen.
Qazbek QUTTYMURATULY,
«Egemen Qazaqstan»
Batys Qazaqstan
