Jıynǵa Premer-Mınıstr B.Saǵyntaev, Prezıdent Ákimshiliginiń Basshysy Á.Jaqsybekov, Ulttyq bank tóraǵasy D.Aqyshev, «Samuryq-Qazyna» aksıonerlik qoǵamy basqarmasynyń tóraǵasy A.Esimov, Premer-Mınıstrdiń orynbasarlary A.Mamın jáne A.Jumaǵalıev, Prezıdenttiń kómekshisi Á.Smaıylov, Investısııalar jáne damý mınıstri J.Qasymbek, Ulttyq ekonomıka mınıstri T.Súleımenov, Qarjy mınıstri B.Sultanov, Energetıka mınıstri Q.Bozymbaev, «Samuryq-Qazyna» aksıonerlik qoǵamynyń táýelsiz dırektory R.Evans, ulttyq kompanııalar men kásiporyndardyń jetekshileri qatysty.
Basqosý barysynda «Samuryq-Qazyna» aksıonerlik qoǵamynyń jańarǵan damý strategııasy men Qordy transformasııalaý baǵdarlamasyn qabyldaý máseleleri talqylandy.
Kezdesýdi ashqan Qazaqstan Prezıdenti ulttyq ekonomıkamyzdy nyǵaıtý jáne odan ári damytý isinde «Samuryq-Qazyna» ál-aýqat qorynyń jumysy strategııalyq mańyzǵa ıe bolyp otyrǵanyn atap ótti.
– «Samuryq-Qazyna» ulttyq ál-aýqat qory el ekonomıkasynda mańyzdy ról atqarady. Qordy damytý jónindegi alǵashqy uzaq merzimdi strategııa 2012 jyly qabyldandy. Ol álemdik qarjy daǵdarysynyń saldaryna qarsy turý maqsatymen ázirlengen bolatyn. Sońǵy jyldary ahýal ózgerdi. Ekonomıkamyz syrtqy faktorlardyń áserine tótep berip, ornyqty damý jolyna tústi. Kóp jumys atqaryldy, – dedi Elbasy.
Nursultan Nazarbaev Qordy damytý úshin atqarylǵan jumystarǵa oń baǵa berip, buǵan deıin qabyldanǵan baǵdarlamalardy qazirgi jaǵdaılarǵa sáıkes jańartý qajettigin aıtty.
– Biz ekonomıkamyzdy úshinshi jańǵyrtý jolyna túsip, sıfrlandyrý jónindegi jumystarǵa belsendi túrde kiristik. Elimizdiń 2025 jylǵa deıingi damý strategııasy qabyldandy. Osy oraıda, «Samuryq-Qazyna» ulttyq ál-aýqat qorynyń jańa damý strategııasyn da qabyldaý qajettiligi týyndap otyr. Sondaı-aq, Qordy transformasııalaý baǵdarlamasyn jańartý qajet. Bul baǵdarlamanyń nátıjeleri Qor kompanııalarynyń qyzmetinde de kórinýge tıis, – dedi Memleket basshysy.
Otyrys barysynda «Samuryq-Qazyna» aksıonerlik qoǵamy dırektorlar keńesiniń tóraǵasy – Premer-Mınıstr B.Saǵyntaevtyń, «Samuryq-Qazyna» aksıonerlik qoǵamy basqarmasynyń tóraǵasy A.Esimovtiń, «Samuryq-Qazyna» AQ táýelsiz dırektory R.Evanstyń esepteri tyńdaldy. Jıynǵa qatysýshylarǵa «Samuryq-Qazyna» aksıonerlik qoǵamynyń 2018-2028 jyldarǵa arnalǵan jańarǵan damý strategııasy jáne Transformasııalaý baǵdarlamasy tanystyryldy. Adamı kapıtaldy damytý jáne Qordyń kadr áleýetin tıimdi paıdalaný máselelerine erekshe nazar aýdaryldy.
Nursultan Nazarbaev baıandamashylardy tyńdap, jıynǵa qatysýshylardyń nazaryn tıisti sharalar qabyldaýdy qajet etetin birqatar máselege aýdardy.
– Qordy basqarýdyń tıimdiligin arttyrý máselesine toqtalaıyq. Qor kompanııalaryn basqarýdyń kóp deńgeıli júıesi áli kúnge deıin áreket etip keledi. Bul sheshimder qabyldaýdy kúrdelendiredi, sany kóp ákimshilik-basqarýshylyq personaldy ustaý úshin eleýli qarjy resýrstaryn talap etedi. Basqarý deńgeılerin qysqartý qajet, – dedi Memleket basshysy.
Qazaqstan Prezıdenti sondaı-aq Qordyń aktıvterin jekeshelendirý jónindegi jumysty jalǵastyrýdyń mańyzdylyǵyna nazar aýdaryp, bul baǵdarlamaǵa sheteldik ınvestorlar zor qyzyǵýshylyq tanytyp otyrǵanyn aıtty.
Nursultan Nazarbaev Qor kompanııalaryn sıfrlandyrý úderisine arnaıy toqtalyp, tórtinshi ónerkásiptik revolıýsııa jaǵdaıynda bul baǵdarlamanyń ózektiligin jáne der kezinde usynylyp otyrǵanyn atap ótti.
Budan bólek, Memleket basshysy Qordyń iri ınvestısııalyq jobalaryna qatysty júıeli sheshim qabyldaý qajettigin aıtty.
Jıyn sońynda Qazaqstan Prezıdenti «Samuryq-Qazyna» aksıonerlik qoǵamynyń 2018-2028 jyldarǵa arnalǵan jańarǵan Damý strategııasyn jáne Qordy transformasııalaý baǵdarlamasyn maquldap, onyń ári qaraı júzege asyrylýyn erekshe baqylaýǵa alýdy tapsyrdy.
– Ulttyq ál-aýqat qorynyń jumysy qazaqstandyqtardyń turmysyn jaqsartýǵa jáne el ekonomıkasyn kóterýge baǵyttalýy kerek. Damýdyń jańa strategııasy men Transformasııalaý baǵdarlamasy Qor jumysynyń tıimdiligin arttyryp qana qoımaı, ulttyq ekonomıkanyń odan ári damýyna da yqpal etedi. Osyǵan oraı Úkimet Qor basshylyǵymen birlesip, osy baǵdarlamalardy júzege asyrý baǵytynda belsendi jumys júrgizýi qajet, – dedi Elbasy.
