Buǵan deıin de úlkendi-kishili saıası oqıǵalar qyrǵyz elinde qar ketip, aýa raıy jylyna bastaǵanda kórinis bergeni belgili. Bıylǵy kóktemde de solaı boldy... Taratyp aıtsaq, buǵan deıin el parlamentindegi oppozısııalyq úsh fraksııa – «Respýblıka-Ata Jurt», «Ata Meken» jáne «Onýgýý-Progress» partııalarynyń depýtattary premer-mınıstr Sapar Isakov úkimetiniń 2017 jyldy qorytyndylaǵan esebine qanaǵattanbaıtyndaryn málimdegen edi. Al osynyń aldynda ǵana parlamentte kópshilik mandatqa ıe Sosıal-demokratııalyq partııasy men «Qyrǵyzstan» fraksııasynyń depýtattary úkimettiń ótken jyldyń qorytyndysy týraly osy esebin qanaǵattanarlyq dep baǵalaǵan-dy.
Otstavkaǵa ketken S.Isakovtyń úkimeti 2017 jyldyń 26 tamyzynda ǵana qyzmetterine kirisken bolatyn. Eks-premer úkimet quramyn parlamenttegi kópshilik koalısııasyna kiretin Sosıal-demokratııalyq partııasynan, «Bır bol» jáne «Qyrǵyzstan» fraksııalarynan jasaqtaǵan edi. Aıta keteıik, S.Isakovqa deıin Qyrǵyzstan úkimetine qazirgi prezıdent S.Jeenbekov basshylyq etken-di.
El úkimetine senimsizdik bildirý máselesin parlament otyrysynyń kún tártibine «Respýblıka-Ata Jurt» fraksııasynyń jetekshisi Jyrgalbek Týrýskýlov shyǵarǵan. Qyrǵyzstandyq buqaralyq aqparat quraldarynyń habarlaýynsha, atalǵan máseleni aldymen Jogorký keneshtiń konstıtýsııalyq zańnama, memlekettik qurylym, sot-quqyqtyq máseleler jáne reglament jónindegi komıteti parlamentte azshylyqty quraıtyn oppozısııalyq fraksııalardyń úkimetke senimsizdik bildirý týraly máseleni talqylaýǵa shyǵarýyn qoldaǵan. Bul máseleni, sondaı-aq salalyq komıtetter de, depýtattar da qaraǵan eken.
Al otyrysta daýys berýge qatysqan 106 depýtattyń 101-i úkimetke senimsizdik bildirýdi qoldap daýys beripti. Bes depýtat buǵan qarsy bolǵan. Sóıtip el seniminen shyǵa almaǵan S.Isakovtyń úkimeti segiz aıdan soń otstavkaǵa ketti. Ásili Qyrǵyzstan konstıtýsııasynyń 85-baby boıynsha Jogorký kenesh depýtattardyń úshten biriniń bastamasymen úkimetke senimsizdik bildirý máselesin qaraı alady. Senimsizdik bildirý týraly qaýly jalpy depýtattar sanynyń jartysynan kóbi daýys bergen jaǵdaıda qabyldanady. Osy tusta atap óteıik, úkimetke senimsizdik bildirgen soń prezıdent úkimetti otstavkaǵa jiberýge nemese parlament sheshimimen kelispeýge quqyǵy bar.
Qyrǵyzstan prezıdenti Sooronbaı Jeenbekov parlamenttiń sheshimimen kelisti, úkimetti otstavkaǵa jiberdi. Prezıdenttiń úkimetti qurýdy kimge tapsyrǵany jóninde qazirge aqparat joq. Bolashaq premer-mınıstrdiń aty-jóni kóp keshikpeı belgili bolyp qalar.
Álısultan QULANBAI,
«Egemen Qazaqstan»
