Kópten beri óreli ónerimen kózge túsip júrgen Nursultan Qasymhanovtyń esimi qalyń kórermenge etene tanys. Sporttyq mansabyn qazaq kúresinen bastaǵan Almaty oblysy, Alakól aýdanynyń týmasy osy kúnge deıin 8 kezdesý ótkizip, 7 ret jeńiske jetti. Byltyr ol Almatyda ótken Gran-prı týrnırinde 66 kılo salmaq dárejesinde qarsylas shaq keltirmeı, bas júldege tigilgen «temir tulpardy» tizgindedi. Sodan Nursultanǵa bedeli jaǵynan álemde alǵashqy úshtikke enip otyrǵan ASV (Absolute Championship Berkut) uıymy basshylarynyń kózi tústi. Qos tarap 4 jekpe-jek ótkizý jónindegi kelisimshartqa qol qoıdy. «Sultan» degen laqap atpen tanymal qandasymyz tusaýkeser kezdesýin 21 sáýirde Italııada ótkizedi. Qasymhanovtyń qarsylasy – Shvesııa sportshysy.
29 sáýirde Cheshenstannyń Groznyı qalasynda Asý Almabaev pen jergilikti sportshy Shámil Ahmaev aıqasady. Qazirgi kezge deıin Asý 8 báseke ótkizip, 6 ret basymdyq tanytty. Qarsylasy 6 ret kúsh synasyp, sol kezdesýlerdiń teń jarysynda jeńis toıyn toılady.
Kópshilik taǵatsyzdana kútken básekeler 5 mamyrda Máskeýde ótedi. Ataqty ASV nusqasy boıynsha uıymdastyrylyp otyrǵan dúbirli dodada Alashtyń qos maqtanyshy – Arman «Suńqar» Ospanov (65,8 kılo) pen Asyljan «Saq» Baqytjanuly (93 kılo) óner kórsetedi. Ekeýiniń de júrip ótken joly jankúıerlerdiń kóz aldynda. Erejesiz jekpe-jekten ótken 10 jekpe-jekte 8 ret jeńiske jetken 28 jastaǵy Arman Ospanov armenııalyq Akop Stepanıanmen saıysqa túsedi. Ońtústik Qazaqstan oblysy, Tóle bı aýdanynyń týmasy 2017 jylǵa deıin qarsy kelgenderdiń barlyǵyn qoǵadaı japyrǵan edi. Tek sońǵy eki kezdesýde qandasymyzdyń joly bolmady. Desek te osy qos sátsizdiktiń ózindik sebep-saldary bar. Brazılııalyq Tıago Sılvamen ol jaraqatynan aıyqpaı shyqsa, reseılik Alekseı Polpýdnıkovpen bolǵan básekede tóreshiler bura tartqanyna barsha jurt kýá. Al 31 jastaǵy Akop Stepanıan «Mergen» degen laqap atpen tanymal. Qap taýynyń qyrany kúni búginge deıin 35 kezdesý ótkizip, 25 ret basymdyq tanytty.
Almatylyq Asyljan Baqytjanuly 7 básekeniń barlyǵynda óz qarsylastaryn kúmánsiz utty. Byltyrǵy jyldyń sońynda ASV nusqasyndaǵy kezdesýinde 26 jastaǵy órenimiz reseılik Músilim Mahmýdovty esinen tanǵansha sabap, kópshiliktiń qoshemetine bólendi. Bul joly ol taǵy bir jergilikti sportshy Músilim Magomedovpen aıqasady.
Ǵalym SÚLEIMEN,
«Egemen Qazaqstan»
ALMATY
