Atalǵan is-shara Qazaqstan Respýblıkasy Qorǵanys jáne aeroǵarysh ónerkásibi mınıstrliginiń qamqorlyǵynda ótetin alǵashqy kórme.
Oǵan otandyq jáne sheteldik qorǵanys-ónerkásip kesheni men ǵarysh salasynyń kásiporyndary, jetekshi konstrýktorlyq bıýro men ǵylymı-zertteý ınstıtýttary qatysady.
Qazaqstannyń astanasy – Astana qalasynyń 20 jyldyǵyna oraı «KADEX - 2018» kórmesi jańa formatta ótedi.
Onda qarý-jaraq úlgilerin kórsetýden bólek, baǵdarlamanyń iskerlik bólimine de nazar aýdarylady. Baǵdarlamanyń ǵylymı-iskerlik bóliminde plenarlyq jáne seksııalyq otyrys, konferensııa, «dóńgelek ústel» formatynda barlyq elderdiń mamandary qorǵanys jáne qaýipsizdik, álemdik ǵarysh salasyn damytý máseleleri tóńireginde pikir almasyp, zamanýı kezeńde kıberqorǵanyspen qamtamasyz etý suraqtary talqylanady.
«KADEX - 2018» kórmesiniń ózgeshe jańalyǵy onyń aýmaǵynda «Qazaqstandaǵy ǵarysh kúnderi» Halyqaralyq forýmynyń ótkizilýi bolmaq. Tuńǵysh ret kórmede otandyq jáne álemdik ǵarysh salasynyń jetistikterine arnalǵan jeke pavılon bolady.
Kórmeniń iskerlik baǵdarlamasy aıasynda «Cyber and Digital Security» ı «Advanced Def Tech» konferensııalary ótedi. Bul sharalar álemniń túrli elinen kelgen mamandar men ekspertter qorǵanys ónerkásibi, áskerı-tehnıkalyq yntymaqtastyq, ǵarysh qyzmeti men aqparattyq qaýipsizdik máselelerin talqylaıtyn Kórmeniń ortalyq dıalogtyq aýmaǵy bolmaq.
Kórmeniń alǵashqy kúni «KADEX - 2018» emblemasymen birge arnaıy pochta mórqalyby soǵylǵan konverttegi Qazǵaryshtyń 25 jyldyǵyna arnalǵan pochtalyq markany óshirý saltanaty ótedi. Kez kelgen adam estelikke Kórme aýmaǵynan marka men pochta mórqalyby soǵylǵan konvertti ala alady.
Kórme ótkizýde negizgi basymdyq tájirıbelik quramdas bólikke berildi. Resmı sharalarmen birge iskerlik baǵdarlamalarda da áskerı-tehnıkalyq yntymaqtastyq, ǵarysh qyzmeti men kıberqorǵanys salalary boıynsha alys-jaqyn shetelderdiń uıymdary jáne kásiporyndarymen birge birqatar qujattarǵa – memorandýmdar men kelsimderge qol qoıý josparlanýda.
«KADEX - 2018» kórmesi bıznes ókilderi, áskerı maqsattaǵy ónimderdi óndirýshiler men jasaýyshylar, beıindi mınıstrlik mamandary men memleketaralyq qatysnastary men syrtqy saıası kózqarastary táýelsiz túrli elder uıymdary úshin konstrýktıvti dıalog alańy bolady.
