ng.kz
Jurtshylyq jıyn ótkizip, bolashaq qalanyń atyn Tobyl dep qoıýǵa uıǵarym da jasap qoıǵan. Qala mártebesin suraǵan qujattar qazir respýblıka basshylyǵyna jiberilgen, eger Elbasy qol qoısa, Qostanaıǵa qanattas qala qanat qaǵady.
Oblys ákimi Arhımed Muhambetov qatysqan májiliste bolashaq qalany damytý máselesi qaraldy. Qostanaı aýdanynyń ákimi Qaırat Ahmetov aldymen aýdannyń búgingi ekonomıkalyq-áleýmettik kórsetkishterin aıtyp ótti. Sońǵy eki jylda aýdan bıýdjeti 5,8 mlrd teńgege artty, ıaǵnı 7,5 mlrd teńgeden 13 mlrdtan astam teńgege ósti. Aýdan halqynyń sany 70 463 adam, sonyń 51 paıyzynan astamy aýdan ortalyǵy men oǵan irgeles Zarechnoe jáne Mıchýrın selolarynda turady. Bul selolardyń ekeýi de bolashaq qalaǵa qosylatyn bolady.
Qaırat Ahmetov bolashaq qalaǵa eń aldymen 16 MVt qýatty podstansııa qajettigin, onyń quny 2,2 mlrd teńgege túsetindigin aıtty. Onyń syrtynda joldardy jóndeý, aýyz sýmen qamtamasyz etýdi, kanalızasııany keńeıtý, turǵyn úıler men densaýlyq saqtaý, mádenıet salasy nysandaryn salý, qalany kórkeıtý men kógaldandyrý jumystary júrgiziletindigin aıtty. Olardyń barlyǵy da mıllıondaǵan teńge qarjyǵa túsetini belgili, aýdan ákimi ol qarjynyń aldyn ala boljamdy kólemin de ortaǵa saldy.
Oblys ákimi Arhımed Muhambetov aýdan ákimi Qaırat Ahmetovten aýdannyń óndiristik-ınnovasııalyq damýy josparyn surady. Aýdan ákimi oǵan óndiristik jobalar jasaýǵa esh múmkindik joq ekenin, óıtkeni podstansııa qýaty jetpeıtindikten elektr energııasy tapshy ekendigin aıtty.
Bolashaq qalany damytý úshin tek bıýdjetten ala bergen bolmaıtyndyǵyn, bıýdjetti toltyrý jaǵyn da oılastyrý kerektigin eskertti oblys ákimi.
– О́ndiristi damytýǵa ınvestor, áleýmettik nysandar salýǵa memleket pen jekeniń áriptestigin tıimdi paıdalaný kerek, – dedi oblys ákimi Arhımed Muhambetov. Ol bolashaq qala úshin jasalyp otyrǵan búgingi jospardyń barlyǵy da aldaǵy ýaqytta oryndalatyndyǵyn, oǵan ýaqyt jáne tıimdi jumystar júrgizý kerektigin aıtty.
Názıra Járimbet
«Egemen Qazaqstan»
Qostanaı oblysy,
Qostanaı aýdany
