«Rýhanı jańǵyrý» baǵdarlamasy aıasynda «Qazaq tilindegi 100 jańa oqýlyq» jobasyn talqylaýǵa arnalǵan bul sharaǵa Qazaqstan halqy Assambleıasynyń, ǵylymı-saraptamalyq tobynyń músheleri, ýnıversıtettiń professorlyq-oqytýshylar quramy jáne stýdentter qatysty.
«National bookdating» aksııasy sharasyn ashqan QEÝ-diń áleýmettik máseleler boıynsha prorektory, professor Qosman Ábilov Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń qoǵamdyq sanany jańǵyrtý baǵytynda atqaryp kele jatqan sharapatty rólin atap ótip, «100 jańa oqýlyq» jobasynyń bilim berý isinde óskeleń urpaq úshin mańyzy zor sharýa ekenin aıtty. Aksııa barysynda spıkerler aýdıtorııany álemdegi eń úzdik kitaptardyń aýdarmalarymen tanystyrdy.
Eske sala ketsek, N.Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynyń jarııalanǵanyna bıyl bir jyl tolyp otyr. Baǵdarlama ishinde «Jańa gýmanıtarlyq bilim. Qazaq tilindegi 100 jańa oqýlyq» jobasy da bar. Osy ýaqytqa deıin atalǵan joba aıasynda fılosofııa, dintaný, antropologııa jáne jýrnalıstıka boıynsha 18 kitap pen oqý quraly jaryqqa shyqty. Árbir oqýlyq 10 myń danamen basylyp shyǵyp, aldaǵy bir aıdyń ishinde joǵary oqý oryndary men kitaphanalarǵa taratylady. Bıyldan bastap oqý baǵdarlamasyna da engiziledi. Sonymen qatar barlyq oqýlyqtardyń elektrondy nusqalary jáne sonyń negizinde ázirlengen beınedárister toptamasy Qazaqstannnyń ashyq ýnıversıteti platformasy (OpenU.kz) arqyly taratylatyn bolady.
Qaırat ÁBILDA,
«Egemen Qazaqstan»
QARAǴANDY
