Bul oraıda, aldaǵy birneshe jylda gýmanıtarlyq bilimniń barlyq baǵyttary boıynsha álemdegi eń jaqsy 100 oqýlyqty ártúrli tilderden qazaq tiline aýdarylatyny aıqyndaldy. Búginde alǵashqy oqýlyqtardyń tusaýy kesilip, bul is nátıjeli júzege asyryla bactaǵany málim.
Shymkenttegi Qazaqstan halqy Assambleıasy ǵımaratynda ótken jıynda jańa oqýlyqtardyń mán-mańyzyna arnaldy. «Qazaq tilindegi 100 jańa oqýlyq» jobasyn talqylaý boıynsha Qazaqstan halqy Assambleıasynyń biryńǵaı kúnin ótkizý aıasynda uıymdastyrylǵan OQO QHA músheleri men Qoǵamdyq kelisim keńesiniń birlesken otyrysynda ǵalymdar, zııaly qaýym ókilderi, etnomádenı birlestikterdiń tóraǵalary men medıatorlar óz oı-pikirlerin ortaǵa saldy. Mysaly, Aımaqtyq áleýmettik-ınnovasııalyq ýnıversıteti «Qazaqstan halqy Assambleıasy» kafedrasynyń meńgerýshisi Úsen Asqarov oqýlyqtardyń mańyzyna toqtaldy. «Elbasy bastamasynyń arqasynda elimizdiń stýdentteri qazaq tilinde jazylǵan álemniń úzdik oqýlyqtaryna qol jetkizip otyr. Túrli saladaǵy kitaptar jastardyń ǵana emes, jalpy qazaqstandyqtardyń úlken kómekshi quralyna aınalady degen senimdemin. Bizdiń kezimizde kóptegen kitaptar qoljetimsiz boldy. Onyń ústine orys tilinde ǵana oqı alatynbyz. Al búginde, mysaly Gregorı Menkıý men Mark Teılordyń «Ekonomıks» kitabynyń tórtinshi basylymy qazaq tiline aýdarylyp, stýdentterge jol tartty. Ataqty Garvard ýnıversıtetiniń stýdentteri dál osy kitaptan bilim alady»,– dedi Ú.Asqarov.
100 jańa oqýlyqtyń qoǵamdyq sanany jańǵyrtýdaǵy róli erekshe ekenin atap ótken jazýshy Marhabat Baıǵuttyń aıtýynsha, oqýlyqtardyń alǵashqy legi basylyp shyqqanda óńirdegi 50-ge jýyq aqyn-jazýshy bas qosyp, taldaý júrgizgen. «Jobanyń basty ereksheligi ol – kitaptardyń tikeleı ana tilinen aýdarylýy. Al buryn oqýlyqtar tek orys tilinen tárjimalanatyn. Jarasymdy joba jalǵasyn taba bersin degen tilektemiz»,– deıdi jazýshy.
Aıta keteıik, jaqynda joba boıynsha aýdarylǵan 18 oqýlyqtyń tusaýy kesilgen bolatyn. Árqaısysy 10 myń danamen basylǵan oqýlyqtar aldaǵy ýaqytta elimizdiń barlyq óńirlerine taratylyp, kitaphana sórelerinen tabylatyn bolady.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy
