Is-sharany Abaı atyndaǵy Qazaq ulttyq pedagogıkalyq ýnıversıteti, Sorbonna-Qazaqstan ınstıtýty jáne Fransııanyń Qazaqstandaǵy elshiligi uıymdastyrdy. Onyń jumysyna Fransııa elshisi F.Martıne, osy elden kelgen sarapshylar, Joǵarǵy sot, Joǵary Sot Keńesi, quqyq qorǵaý organdarynyń basshylary, sondaı-aq belgili zańger-ǵalymdar qatysty.
О́ziniń quttyqtaý sózinde Q.Mámı: «Demokratııalyq jáne quqyqtyq memlekette Konstıtýsııa jeke bostandyq pen qoǵamdyq qajettilik arasyndaǵy qarym-qatynas ólshemin aıqyndaıdy. Ol bir jaǵynan adamnyń bostandyǵyn bekitedi, al ekinshi jaǵynan erekshe qorǵalatyn konstıtýsııalyq qundylyqtardy qorǵaýdyń tetikterin bildiredi. Osy máselede olardy tıisinshe qorǵaýdy qamtamasyz etýge, sondaı-aq quqyq ústemdiginiń jalpy qabyldanǵan qaǵıdattaryna qol suqpaýǵa múmkindik beretin túrli áleýmettik mańyzy bar múddelerdiń ońtaıly teńgerimin tabý qajet. Quqyqtar men bostandyqtardy quqyqtyq retteý dárejesi quqyq qoldanýdyń sapasy retinde elimizdiń damý deńgeıin, halyqtyń ál-aýqatyn kórsetedi, túptep kelgende memlekettiń álemdik reıtıngin aıqyndaıdy. Adamı kapıtal kez kelgen memlekettiń damýynyń dińgegi men qozǵalys faktory bolyp tabylady. О́tken jyly Qazaqstan Respýblıkasynyń Prezıdenti ózara baılanysty eki jalpyulttyq joba – «Rýhanı jańǵyrý» baǵdarlamasyna jáne konstıtýsııalyq reformaǵa bastamashylyq jasady. Sońǵysy búkil quqyq qorǵaý júıesin odan ári jańǵyrtý úshin quqyqtyq negiz qurdy. Adamnyń quqyqtary men bostandyqtary salasynda konstıtýsııalyq zańdylyqty qamtamasyz etýde bizdiń elimizdegi mańyzdy ról Konstıtýsııalyq Keńeske tıesili», dedi.
Sondaı-aq Konstıtýsııalyq Keńes tóraǵasy qoǵamnyń kemeldený dárejesi berilgen quqyqtar men bostandyqtardyń kólemimen emes, olardy adamnyń, qoǵamnyń jáne memlekettiń ıgiligine qoldana bilýimen aıqyndalady dep atap ótti. Erkin qoǵam – adamzat órkenıetiniń basty jetistikteriniń biri.
«Osy jyldar ishinde Qazaqstan osy ıdealǵa eleýli túrde baǵyt aldy jáne sol alǵan qarqynyn jalǵastyryp keledi», dep túıindedi Q.Mámı.
«Egemen-aqparat»
