Lıftiler qyzmeti qatań baqylanýy tıis

«Azamattyq qorǵaý týraly» zańǵa sáıkes, lıftiler qaýipti tehnıkalyq qurylǵylarǵa jatady jáne olardy paıdalaný qaýipsizdigi ónerkásiptik qaýipsizdik talaptaryna saı bolýǵa tıis. Investısııalar jáne damý mınıstrligi ónerkásiptik qaýipsizdik salasyndaǵy ýákiletti organ bolyp tabylady. «Qazaq­stan Respýblıkasynyń memleket­tik basqarý deńgeıleri arasynda ókilettikterdiń arajigin ajyratý jónindegi sharalar týraly» Qazaqstan Respýblıkasy Prezıdentiniń 2014 jylǵy 25 tamyzdaǵy №898 Jarlyǵyna sáıkes turǵyn úı-kommýnaldyq sharýa­shylyq obektilerinde bekitilgen lıfti­lerdi baqylaý jergilikti atqarý­shy organdardyń quzyryna, ıaǵnı qalalyq turǵyn úı ınspeksııa­laryna berildi. Biraq is júzinde qalalyq turǵyn úı ınspeksııalaryna lıftilerdi jańǵyrtýdy, rekonstrýksııalaýdy jáne jóndeýdi qosa alǵanda, olardy tehnıkalyq kútip ustaý boıynsha baqylaý fýnksııalaryn iske asyrý jónindegi ókilettikter berilmegen.

Jergilikti atqarýshy organdar­ǵa ýákiletti organ bergen shtat birlikteri ónerkásiptik qaýipsizdik salasyndaǵy memleket­tik ınspektor mártebesin ıelenbegen.

Keden odaǵynyń «Lıftiler qaýip­sizdigi» degen tehnıkalyq reg­lamentinde lıftini paıda­lanýǵa berý aldynda obektide bekitilgen lıftiniń tehnıkalyq regla­ment talaptaryna sáıkesti­gin baǵalaý júrgizilýge tıis ekeni belgilengen.

О́z kezeginde, Investısııalar jáne damý mınıstrligi qaýipti óndiristik obekt bolyp tabylatyn lıftilerdiń ónerkásiptik qaýipsizdigine saraptama júrgizýge mindetti.

Sonymen birge qalalyq turǵyn úı ınspeksııalary men Inves­tısııalar jáne damý mınıstrligi Indýstrııalyq damý jáne ónerká­siptik qaýipsizdik komı­tetiniń aýmaq­tyq bólimsheleri ara­synda fýnksııalardyń qaıta­lanýy óki­lettikterdiń naqty arajigin ajy­ratýdy qajet etip, tutastaı alǵanda lıft sharýashylyǵynda baqylaý fýnksııalaryn iske asyrý boıynsha jaýapkershiliktiń joqtyǵyna alyp keldi. Osynyń saldary­nan jergilikti jerlerde lıftiler­di tehnıkalyq kútip ustaýdy júze­ge asyratyn kompanııalardyń qyzmetine baqylaý jasalmaıdy, olardyń qyzmetine qoıylatyn talaptar aıqyndalmaǵan, lıft uıymdaryn sertıfıkattaý tetigi ázirlenbegen. Sondaı-aq bizdiń oıymyzsha, lıftilerdi montajdaý jáne olarǵa tehnıkalyq qyz­met kórsetý quqyǵyna lısenzııa berýdiń kúshin joıý jaǵdaıdy ýshyq­tyryp otyr. Baqylaý tetigi jolǵa qoıylmaıynsha, lıfti­ler adam ómirine qaýipti bolyp qala beretini anyq. Qazaq­stan Lıft­shileriniń ulttyq qaýym­das­t­yǵynyń derekteri boıynsha, res­pýb­lıkamyzdyń asa iri jeti qala­synda 7000-ǵa jýyq lıft kúrdeli jańǵyrtýdy nemese aýy­s­tyrýdy qajet etedi.

Astana qalasynyń ózinde shamamen 60 servıstik kompanııa jumys isteıdi, olardyń bolmashy bóliginiń ǵana shyn máninde quzyretteri, mamandary jáne qajetti óndiristik-tehnologııalyq bazasy bar. 2016 jyldan bastap 2018 jyldyń búgingi kúni aralyǵynda tótenshe jaǵdaılar departamentine «112» nómirine Astana lıftilerindegi apattyq jaǵdaılarǵa baılanysty 934 qońyraý shalynǵan. Jańa­dan salynǵan turǵyn úı keshen­derindegi lıftilerdiń de udaıy isten shyǵyp jatatyny tań­ǵaldyrmaıtyn boldy. Lıfti­lerdiń apattylyǵy máselesi ártúrli ákimshilik deńgeılerde tal­qy­lanǵanymen, jaǵdaıdyń ózger­megenin atap kórsetý kerek.

Sondyqtan Premer-Mınıstr Baqytjan Saǵyntaevtan joǵaryda baıandalǵandarǵa baılanysty:

1.Baqylaý-ruqsat berý fýnksııalaryn yryqtandyrý boıynsha júrgizilip jatqan reforma jaǵdaılarynda ónerkásiptik qaýipsizdik salasyndaǵy ýáki­letti organ men jergilikti atqa­rý­shy organdar arasynda lıft jabdyqtaryn baqylaýdy júzege asyrý jónindegi fýnksııa­lar­dyń qaıtalanýyn bolǵyzbaý jáne turǵyn úı ınspeksııasy qyzmet­kerlerine tıisti ókilet­tikteri bar memlekettik ınspektorlar már­tebesin berý jóninde sharalar qabyldaýdy;

2.Lıftiniń jáne lıft qaýip­sizdigi qurylǵysynyń sáıkes­tigin rastaýdy sertıfıkattaýdy júrgizýdiń biryńǵaı tetigin ázirleýdi;

3.Lıft qyzmetin kórsetýge ar­nalǵan biryńǵaı salalyq standartty, onyń ishinde lıftilerdiń biryńǵaı elektrondyq tizilimin qurý týraly máseleni qarastyrýdy;

4.Keden odaǵynyń «Lıftiler qaýipsizdigi» degen tehnıkalyq reg­lamenti talaptarynyń qatań saq­talýyn qamtamasyz etýdi;

5.Montajdaý uıymdaryn, servıstik kompanııalardy jáne jabdyqtardy ımporttaýshylardy tańdaýǵa qoıylatyn talaptardy retke keltirýdi suraımyz.

Marat TAǴYMOV,

Senat depýtaty