QR ulttyq ekonomıka birinshi vıse-mınıstri Rýslan Dálenov, «Ekonomıkalyq zertteýler ınstıtýty» AQ basqarma tóraǵasynyń orynbasary Baýyrjan Muqan, «Qazaqstandyq ekonomıkalyq bastamalar qory» korporatıvtik qorynyń dırektory Dınara Joldaspaeva jáne GVA Kazakhstan basqarýshy seriktesi Fılıpp Serajetdınov forýmnyń qashan ári qalaı ótetini, ony uıymdastyrýshylar qandaı jańashyldyqtar usynatyny, AEF qatysýshylarynyń ókilettigi qandaı bolatyny, sondaı-aq jastarǵa qandaı baǵdarlamalar qarastyrylǵany týraly aıtyp berdi.
XI Astana ekonomıkalyq forýmy 17-19 mamyr aralyǵynda ótedi. Rýslan Dálenovtyń aıtýynsha, onyń buǵan deıin ótken sharalardan basty aıyrmashylyǵy – jańa format jáne jahandyq kún tártibi.
«Forým 10 jyl qatarynan ótkizilip keledi jáne de ekonomıkalyq oı, ıdeıa men tájirıbeni baılanystyratyn halyqaralyq alańǵa aınaldy. Sharaǵa 10 jyl ishinde álemniń 150 elinen 50 myńnan astam delegat qatysty. Forýmnyń áseri zor: munda halyqaralyq ınvestorlardy tartýdan bastap elimizde jáne álemde ekonomıkalyq saıasattyń kún tártibin qalyptastyrý jónindegi jańa ıdeıalarmen almasýǵa deıin qarastyrylǵan», dedi Rýslan Dálenov.
Sonymen qatar, birinshi vıse-mınıstrdiń aıtýynsha, forýmdy qaıta jańartatyn ýaqyt jetti.
«Álem ózgerýde, Qazaqstanda jańǵyrtý jumystary júrgizilip jatyr, demek forým da jańa talaptarǵa saı bolýy kerek. Jańartylǵan forým jahandyq syn-tegeýrinder týraly álemniń jetekshi sammıtine aınalýy tıis, bul AEF-tiń mazmuny men ótkizý formasyn ózgertý qajettigin bildiredi», dedi R. Dálenov.
Forým suraqtarynyń usynylǵan taqyryby tereń jáne jan-jaqty saraptamalyq kózqarasty, tıisti tereńdikti jáne talqylaýdyń joǵary dárejesin kózdeıdi.
Uıymdastyrýshylardyń aıtýynsha, AEF zııatkerlik elıta ókilderi álemdik kún tártibindegi ózekti máselelerdi talqylaıtyn jáne olardy sheshý boıynsha usynystar ázirleıtin alańǵa aınalady.
Talqylaýǵa 11 jahandyq taqyryp usynylady: biryńǵaı ekonomıka álemi, jahandyq strategııa álemi, resýrstar álemi, jańa taza energııa álemi, uzaq ómir súrý álemi, bolashaq aqshalary álemi, jahandyq qaýipsizdik álemi, jańa adamzat álemi, qalalar álemi, sıngýlıarlyq álemi jáne sıfrlyq álem.
