Jıyn barysynda aımaq basshysy «Bolashaqqa baǵdar: rýhanı jańǵyrý» atty Elbasynyń baǵdarlamalyq maqalasy turǵyndar arasynda keńinen nasıhattalǵanyn atap ótti.
«Aqtóbede bir jyl ishinde «Rýhanı jańǵyrý» baǵdarlamasynyń materıaldyq bazasy jasaldy. Oblys ekonomıkasynyń damýy qoǵamdyq sananyń jańǵyrýyna, halyqtyń ál-aýqatynyń artýyna oń áser etti. Negizgi baǵyttar «Atameken», «Tárbıe jáne bilim», «Rýhanı qazyna» jáne «Aqparat tolqyny» – 4 kishi baǵdarlamalary boıynsha jalpy quny 12,5 mlrd teńgege 89 iri joba iske asyryldy. Jyldyń basty jobasy «Týǵan jer» respýblıkalyq jerlester forýmy deýge bolady. Forýmǵa 20 memleketten: AQSh, Germanııa, Birikken Arab Ámirlikteri, Reseı, Ýkraına, Armenııa jáne Ázerbaıjannan barlyǵy 300-den astam jerlester qatysty. Oblysymyzdyń ekonomıkalyq damýyna baǵyttalǵan 80 mlrd teńgeni quraıtyn 20 memorandýmǵa qol qoıyldy. «Týǵan jer» forýmyna kelgen jerles 23 medısına salasynyń ataqty dárigerleri 29-dan asa kúrdeli operasııa jasap, 1500 medısına qyzmetkerin qamtıtyn 14 semınar ótkizdi. Forým aıasynda «Týǵan jerge taǵzym» aksııasy júzege asyryldy. Qutty meken – Aqtóbede jalpy quny 5,7 mlrd teńge turatyn 614 áleýmettik joba júzege asyryldy. Jerlesterdiń qoldaýymen 28 skver men park qurylysy (300 mln) salyndy, áleýmettik nysandar jóndeldi, eldi mekenderdiń ınfraqurylymdary jaqsartyldy. Bıyl «Týǵan jerge taǵzym» aksııasy óz jalǵasyn tabady. О́ńirde jalpy quny 2 mlrd 750 mln teńgege 648 joba júzege asyrylady. Elimizde tuńǵysh ret Aqtóbe oblysynda «Analarǵa taǵzym» rýhanı-tárbıe berý ortalyǵynyń qurylysy bastaldy. Bul joba shetelderde jáne respýblıka kóleminde turyp jatqan jerlesterimiz – aqtóbelikterdiń qoldaýymen júzege asyrylýda», dedi ol.
Sonymen qatar aımaq basshysy balalardyń shyǵarmashylyq qabiletin damytýdy, fýnksııalyq saýattylyǵyn arttyrýdy, daryndylyǵyn anyqtaýdy, basqarýshylyq qasıetin damytýdy, kásipkerlikke beıimdeýdi, mamandyq tańdaýyna jol ashýdy kózdeıtin quny 1,5 mlrd teńge turatyn «Shyǵarmashylyq akademııasy» salynǵanyn tilge tıek etti.
«Búgingi kúni Shyǵarmashylyq akademııasy 7 baǵytta 45 úıirme ashyp, 5000-nan astam jasóspirimdi tárbıeleýde. Bıznestiń áleýmettik jaýapkershiligi aıasynda quny 1,5 mlrd teńge turatyn 720 oryndyq «Jekpe-jek» sport saraıy salyndy. Búgingi kúni munda halyqaralyq jáne respýblıkalyq dárejedegi sporttyq jarystar ótkizilýde. Aqtóbede alǵash ret quny 480 mln teńge turatyn Hokkeı modýliniń qurylysy salyndy. Sport kesheninde 800-ge jýyq bala mánerlep syrǵanaýmen, short-trekpen, hokkeımen tegin aınalysýǵa múmkindik aldy. «Sábı» qaıyrymdylyq qorynyń qarjysyna quny 1,4 mlrd teńge turatyn «Meıirim» áleýmettik beıimdeý jastar ortalyǵy salyndy, 111 tárbıelenýshi turyp jatyr. Jetim, ata-anasynyń qaraýynsyz qalǵan balalarǵa erekshe qamqorlyq jasaldy. Búgingi kúni 945 balaǵa jergilikti kásipkerler tarapynan qamqorshylar bekitilip, olardyń Turǵyn úı qurylys jınaq bankindegi esep shottary 210 mln teńgege tolyqtyryldy. Sonymen qatar slovak ınvestorlarymen birlesip, 3,8 mlrd teńgeni quraıtyn 2500 oryndyq «Muzaıdyny» sport kesheni salynyp jatyr. Halyqaralyq dárejege saı keletin quny 1,5 mlrd teńgege Tennıs ortalyǵy, kólemi 8,5 myń sharshy metr bolatyn «Jeńil atletıka maneji» halyq ıgiligine usynylady. Jerlesterdiń qoldaýymen qala jáne aýdandarda quny 348 mln teńgege 53 sport, vorkaýt, shaǵyn fýtbol alańdary jáne hokkeı korttary salyndy. Sonymen qatar «Men – aqtóbelikpin!» óńirlik jastar jobasy iske asyrylady. Joba aıasynda 8 baǵyt boıynsha jumys júrgiziledi. Qytaı Halyq Respýblıkasy, Reseı Federasııasynyń Máskeý, Orynbor, Qazan qalalarynda, elimizdiń Astana, Almaty, Oral, Qaraǵandy, t.b. qalalarynda oqıtyn aqtóbelik jastarmen kezdesý ótedi. Jastarǵa Aqtóbede eńbek etýge, oblysymyzdyń damýyna úles qosýlaryna jaǵdaı jasalady», dedi B.Saparbaev.
Baspasóz máslıhaty barysynda oblys ákimi Memleket basshysynyń 5 áleýmettik bastamasyna da toqtalyp, osy oraıda atqarylyp jatqan máselelerdi tilge tıek etti.
«Parlamenttiń birlesken otyrysynda Elbasy halyqqa 5 jańa áleýmettik bastamasyn jarııalady. Birinshi bastama: «Árbir otbasyna baspana alýdyń jańa múmkindikterin berý». Aǵymdaǵy jyly biz 870 myń sharshy metr nemese kem degende 8 myń páter salýdy aýqymdy mindet retinde qoıdyq. Alaıda, Elbasy aıtqandaı, bul áli jetkiliksiz. «7 – 20 – 25» bastamalyq baǵdarlamasy osy máseleni sheshýge oń áser etedi. Aǵymdaǵy jyldyń sońyna deıin óńir ekonomıkasynyń ósimin kem degende 5 paıyzǵa ósirý jumystary jalǵasatyn bolady», dedi Aqtóbe oblysynyń ákimi.
Raýan QAIDAR,
«Egemen Qazaqstan»
