Bas hatshynyń aıtýynsha, Sırııadaǵy ahýaldy tolyqtaı sheshý jalǵyz BUU-nyń qolynan keletin sharýa emes. Ol ásirese, BUU Qaýipsizdik Keńesi ortaq sheshimge kele almaı jatqanda jaǵdaıdyń qıyndap ketkenin aıtyp ótti.
«Sırııada álemniń túkpir-túkpirinen kelgen túrli áskerı toptar áreket etip jatyr. Onda múddeler toǵysyp, qyrǵı-qabaq soǵystyń órti tutandy. Sheıitter men súnnıtter qyrqysyp, aımaqty bólikterge bólip tastady. BUU-nyń tańǵajaıyp jolmen búkil máseleni sheship tastaýyna sený tym ańǵyrttyq bolar edi», dedi A.Gýterrısh.
Sonymen qatar BUU Bas hatshysy taıaýda AQSh tarapy Sırııaǵa jasaǵan áýe shabýyly jóninde de óz pikirin bildirip, qyrǵı-qabaq soǵystyń qaıta bastalǵanyn, alaıda qazirgi jaǵdaıdyń burynǵydan ózgeshe ekenin aıtyp ótken.
«Buryn shıelenis AQSh pen KSRO arasynda bolǵan edi. Qazirgi tańda AQSh pen Reseı burynǵydaı bárin baqylaýda ustaı almaıdy. Túrkııa, Iran, Saýd Arabııasy sekildi kóptegen elder aımaqta belsendilik tanytyp jatyr. Qyrǵı-qabaq soǵysy kezinde kelissóz júrgizýge, baqylaýǵa jáne baılanys ornatýǵa, tipti oqıǵa shıelenisip ketkende de ony shekten shyǵarmaýǵa múmkindik bolatyn. Qazir ondaı qural joq. Sondyqtan ondaǵy ahýal tym kúrdeli», dedi A.Gýterrısh.
Degenmen Bas hatshy Sırııadaǵy ahýaldyń turaqtanýynan áli úmitti ekenin jetkizdi. Onyń paıymdaýynsha, aldaǵy ýaqytta aımaqtaǵy túıtkildiń sheshimi tabylýy tıis. Álemde beıbitshilik pen qaýipsizdik ornatý úshin barlyq tarap ortaq kelisimge kelýi qajet. Sondaı-aq A.Gýterrısh BUU Qaýipsizdik Keńesindegi kelispeýshilikke narazy ekenin atap ótti.
Aýǵanstanda qaıtys bolǵandar sany 63-ke jetti
Aýǵanstan astanasy Kabýldaǵy jáne Baǵlan provınsııasyndaǵy terrorıstik shabýyldan qaıtys bolǵandar sany artyp keledi.
Daýys berý ýchaskelerindegi jarylystan qaza tapqandar sany 63-ke jýyqtap, júzdegen adam jaraqat alǵan. Áýeli Kabýldegi kýálik berý mekemesinde jankeshti ózindegi bombany jaryp jibergen. Sonyń saldarynan 57 adam mert bolǵan. Keıinirek Baǵlan provınsııasynda bomba tıelgen júk kóligi daýys berý ýchaskesine baryp soǵylǵan. Onda qaıtys bolǵandar sany altyǵa jetipti.
Al Jazeera arnasynyń málimetine súıensek, ILIM/DAISh uıymy Kabýldaǵy terrorıstik shabýyldy óz moınyna alǵan. Ázirge Baǵlandaǵy oqıǵany kim uıymdastyrǵany belgisiz. Arnanyń habarlaýynsha, Kabýldaǵy jarylys kezinde kóptegen balalar men áıelder qaza tapqan kórinedi.
Associated Press agenttigine suhbat bergen qoǵamdyq densaýlyq mınıstriniń ókili Vahıd Madjronyń aıtýynsha, oqıǵa ornynda 21 áıel, 5 bala mert bolǵan. Ol qaza tapqandar sany kóbeıýi de múmkin ekenin jetkizdi.
Aıta ketý kerek, bıylǵy qazanda Aýǵanstanda parlamenttik saılaý ótedi. Kabýldaǵy jarylys – daýys berýge qarsy jasalyp otyrǵan tórtinshi shabýyl.
Armenııa premer-mınıstri otstavkaǵa ketti
Armenııa premer-mınıstri Serj Sargsıan eldegi birneshe kúnge sozylǵan narazylyq sherýinen keıin qyzmetten ketti. Bul týraly premer-mınıstrdiń resmı saıty málimdedi.
«Nıkol Pashınıandiki (qarsylyq aksııasynyń jetekshisi red.) durys, meniki qate boldy. Bolǵan oqıǵadan shyǵatyn birneshe jol bar, alaıda men onyń birde-birine barmaımyn. Bul maǵan laıyq emes. Men memleket basshysy qyzmetinen, ıaǵnı premer-mınıstrlikten bas tartamyn. Sizderdiń talaptaryńyzdy oryndaımyn. Elimizge beıbitshilik tileımin», delingen saıtta jarııalanǵan málimdemede.
Taıaýda S.Sargsıan premer-mınıstr bolyp saılanǵan edi. Bul sheshimge kelispegen halyq jappaı kóshege shyǵyp, narazylyǵyn bildirdi. Olar el astanasy Erevannyń ortalyǵyna jınalyp, úkimet ǵımarattaryna kirýge kedergi jasaǵan edi.
Jeksenbi kúni oppozısııanyń talabymen Erevanda S.Sargsıan jáne Nıkol Pashınıan arasynda kelissózder júrgizilgen bolatyn. Sol kúni N.Pashınıan bastaǵan birqatar oppozısııa ókilderi tutqynǵa alyndy. Alaıda dúısenbi kúni olar bosatyldy.
2015 jyly Armenııada konstıtýsııaǵa ózgerister engizilip, el basqarý prezıdenttik bılikten parlamenttik júıege aýysqan bolatyn. Soǵan sáıkes, premer-mınıstr el tizginin ustaıdy.
Aıta ketý kerek, S.Sargsıan Armenııanyń prezıdenti qyzmetin 2008-2018 jyldary atqardy. Al jaqynda ótken saılaýda el prezıdenti bolyp Armen Sarkısıan taǵaıyndaldy.
Sholýdy ázirlegen
Abaı ASANKELDIULY,
«Egemen Qazaqstan»
