Kitaphana men oqyrman arasyndaǵy altyn kópir
Forýmǵa Atyraý, Mańǵystaý, Batys Qazaqstan, Aqtóbe, Ońtústik Qazaqstan oblystarynan kelgen 100-den astam kitaphanashy men Ulttyq akademııalyq kitaphana basshysynyń mindetin atqarýshy Nurjan Joldybalınov qatysty. Sońǵy jyldary álemniń 20 elinde qazaq ádebıeti ortalyǵy ashyldy. Qazir kitaphanalardyń aldynda biryńǵaı elektrondy kitap qoryn qurý jáne barlyq qazaqstandyqqa qoljetimdi etý mindeti tur.
– Elbasynyń «Rýhanı jańǵyrý» baǵdarlamasynyń aıasynda Ulttyq akademııalyq kitaphana qazaq halqynyń tarıhyna, mádenıetine qatysty sheteldik kitaphanalar qoryndaǵy qujattardy zerttep, jınaqtaý isin qolǵa aldy. 3D-kitaphana qurý baǵytynda jumys istep jatyrmyz. Ulybrıtanııa, О́zbekstan, Fransııa, Tatarstan, Túrkııa, Bashqurtstan, basqa da elderdegi kitaphanalardan qujattar alyndy. Ulttyq akademııalyq kitaphanada ataýly zaldar ashyla bastady, – deıdi N. Joldybalınov.
Memleket basshysynyń tapsyrmasymen qolǵa alynǵan «Sıfrly Qazaqstan» baǵdarlamasy kitaphanalarda da júzege asady. 2020 jylǵa deıin barlyq qazaqstandyq kitaptar sıfrly formatqa aýystyrylady. Qazir elimizdegi barlyq kitaphanalar osy maqsatta jumys isteýde. Biryńǵaı qazaqstandyq elektrondy qor qurý mindeti de atalǵan baǵdarlama aıasynda josparlanǵan.
– Ulttyq akademııalyq kitaphananyń aldynda kitaphanashynyń ımıdjin, bedeli men kásibı biliktiligin kóterý mindeti tur. Kitaphana men oqyrmannyń arasyndaǵy altyn kópir – kitaphanashylar, – dep atap ótti N.Joldybalınov.
Mindet – jańa zaman talabyna saı bolý
Sharada aımaqtardan kelgen kitaphanashylar tájirıbe almasty. Ǵabdol Slanov atyndaǵy Atyraý oblystyq ǵylymı ámbebap kitaphana basshysy S.Izmuhambetova barlyq kitaphana qory sıfrly júıege ótýi tıis degen Úkimet tapsyrmasy laıyqty júzege asyp jatqanyn aıtty. «Kitaphana qoryndaǵy sırek ádebıetterdi saqtaý jáne oqyrmanǵa qoljetimdi etý maqsatynda ǵasyrlar qoınaýynan syr shertetin 700-ge jýyq ádebıettiń «Sırek basylymdar» atty derekter bazasy jasaqtalyp jatyr», deıdi Sara Salahatdınqyzy. – Sıfrly formatqa 1137 derek kóshirildi. Dástúrli jumys túrlerimen qatar oqyrman-paıdalanýshylar úshin «Qujattardy elektrondy jetkizý», «Vırtýaldy anyqtama qyzmeti» iske qosyldy». Atyraý oblystyq kitaphanasy Ulttyq kitaphana qurastyrǵan avtomattandyrylǵan aqparattyq Web-RABIS júıesin alǵashqylardyń biri bolyp paıdalanyp otyr».
– Atyraýdaǵy Nazarbaev zııatkerlik mektebiniń kitaphana meńgerýshisi A.Demishova jas oqyrmandar jáne ata-analar klýbtary qurylǵanyn aıtady. «Kitaphanany oqý zaly, mýltımedııa zaly jáne zertteý zaly dep úshke bóldik. Qazir qorymyzda 28 000 kitap bar. Úsh tilde kórkem ádebıet jınaqtalǵan, oqytýshylarǵa arnalǵan ádistemelik materıaldar da jetkilikti», deıdi ol.
S.Báıishev atyndaǵy Aqtóbe oblystyq ámbebap ǵylymı kitaphanasynyń bólim meńgerýshisi Q.Raıymbaeva «Kitaphanalardy jańǵyrtý: órkenıetke enýdiń jańa belesi» taqyrybynda jasaǵan baıandamasynda oblys boıynsha jalpy kitap qory 3 mln 830,6 myń danaǵa jetkenin aıtty. Aımaqtaǵy aýyldyq kitaphanalardy kópfýnksııaly mekemege aınaldyrý, sonyń ishinde aýyl kitaphanasy men kovorkıng ortalyqtaryn uıymdastyrý boıynsha atqarylyp jatqan sharalar qatary az emes. Bıyl Alǵa aýdany Eset batyr modeldi aýyldyq kitaphanasyn, Temir aýdanyndaǵy Keńqııaq modeldi aýyldyq kitaphanasyn, Yrǵyz aýdanyndaǵy Qyzyljar modeldi aýyldyq kitaphanasyn jańǵyrtý josparlanǵan. S.Báıishev atyndaǵy oblystyq ámbebap ǵylymı kitaphanasy «Derekti murany sıfrlandyrý» jobasy aıasynda sıfrlandyrý boıynsha elektrondy sıfrly formatqa kóshirý úshin Elarskan kitap termınalyn qoldana otyryp, óńir tarıhyna qatysty 41 536 qujatty óńdepti. «Kitap – taýar ǵana emes, halyqtyń rýhanı qazynasy, ata-babalarymyzdyń ǵasyrlar boıy jınaqtalǵan aqyl-oıynyń saqtalyp turar altyn qoımasy, osy qoımany tek oqyrmanǵa qajetti kitappen toltyrý kerek. Sonda ǵana kitaphanaǵa kelýshilerdiń sanyn kóbeıte alamyz», deıdi Q.Raıymbaeva.
Mańǵystaý oblysy Beıneý aýdandyq jasóspirimder kitaphanasynyń meńgerýshisi A.Túgelova «Kitaphanalar mádenıet jáne bos ýaqyt ótkizý ortalyǵy retinde» taqyrybynda, J.Moldaǵalıev atyndaǵy Batys Qazaqstan oblystyq ǵylymı ámbebap kitaphanasy ólketaný bóliminiń jetekshisi S.Saǵyntaıqyzy jańa jobalar týraly baıandama jasady.
Ǵ.Slanov atyndaǵy Atyraý oblystyq ǵylymı ámbebap kitaphanasynda ótken jyly «Farıza Ońǵarsynova» kabıneti ashylǵan edi. Atyraýlyq jas qalamgerlerdiń basyn qosqan «Farıza juldyzdary» klýbynyń jetekshisi, aqyn Á.Dáýletbaeva shara aıasynda sheberlik synybyn ótkizdi.
Forým jumysyna Atyraý oblystyq mádenıet, arhıvter jáne qujattama basqarmasynyń basshysy S.Sabyr qatysyp, qoǵamdaǵy kitaphanashylar róliniń jyldan jylǵa mańyzǵa ıe bolyp kele jatqanyna toqtaldy. Kitaphanalar jumysyn jańǵyrtýdyń ózekti máseleleri, mamandardyń kásibı deńgeıi men zamanaýı kelbeti, kitaphanalyq resýrstardy sıfrly formatqa kóshirý, aýyl kitaphanalaryn jańǵyrtý maqsatynda jasalýy tıis jumystar týraly oılar qozǵalyp, pikirler aıtylǵan shara Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyryldy. Onlaın tártibinde ótken forým jumysynda shet aımaqtardyń da kitaphanashylary ózara tájirıbe almasyp, suraq qoıýǵa múmkindik aldy.
Baqytgúl BABASh,
«Egemen Qazaqstan»
ATYRAÝ
