«Napolıden» 4 upaı basymdyqqa ıe bolǵan «Iýve» óz alańynda kem degende teń nátıjeni kóksep edi. Qos komanda 89 mınýt boıy terezesi teń oıyn ótkizdi. Alaıda sońǵy mınýttaǵy buryshtama doby úlken ózgeris ákeldi. Qaltarysta jarq etip joq jerden paıda bola ketken Kalıdý Kýlıbalı Býffon qaqpasyna jeńisti goldy soǵyp ketti. Endi «Napolı» «Iýventýstan» nebári 1 ǵana upaıǵa qalyp tur.
Maýrısıo Sarrıdiń komandasy aldaǵy 4 oıynda janyn salyp óner kórsetedi. Neapol jankúıerleri sońǵy 4 oıynda júrekterin shúberekke túıip otyrary anyq. Mysaly, kelesi týrda «Napolı» adýyndy «Fıorentınamen» kezdesedi. Bul matchta da «kókterdiń» fanattary taqym qysady. Odan keıingi qarsylastar asa qorqynyshty emes. «Torıno» men «Sampdorııa» ortańqoldar qatarynan bolsa, sońǵy týrda kezdesetin «Krotone» shamasy belgili aýtsaıder.
Al «Iýventýstyń» jaǵdaıy máz emes. Úshinshi orynnan dámesi bar «Inter» qajet bolsa «Iýveniń» apshysyn qýyra alady. Al odan keıin Massımılıano Allegrı shákirtteri óz alańynda «Bolonıamen» kezdesip bolǵannan soń, syrtta «Romamen» ushyrasady. Chempıondar lıgasynyń jartylaı fınalynda júrgen rımdikter «Iýventýstiń» ataq-dańqynan túk te sekem almaıdy. Edın Djeko bastaǵan shabýylshylar birinshi aınalymda ketken eseni qaıtarýdy kózdeıdi. Olar Týrındegi oıynda 1:0 esebimen jeńilip qalǵan edi. «Romanyń» da úshinshi orynnan talasy bar. Sońǵy týrda «kári sınora» «Veronany» qabyldaıdy. Onyń ózi de serııadaǵy ornyn saqtap qalý úshin jantalasyp júrgen, artqa sheginerge joly joq jankeshti ujym.
Ne de bolsa Italııa chempıonyn anyqtaý sońǵy týrlarǵa deıin jalǵasyp qalýy ǵajap emes. Apta sońynda ótetin 35-týr qııan-keski matchtarǵa toly bolǵaly tur. «Iýventýs» pen «Napolı» bir-biriniń qateligin kútip, mysyqtileý kúı keshetini anyq.
Ermuhamed MÁÝLEN,
«Egemen Qazaqstan»
