Tarıhtyń qatpar-qatparynan arshyp alǵan bir statıstıkaǵa jol bersek. Dál sol 1984 jyly «Roma» Chempıondar lıgasynyń fınalyna shyqqan kezde penaltı serııasynan jeńilip qalyp edi. Jeńimpaz komanda dál osy – «Lıverpýl». Mine, sodan beri «Roma» álemdegi klýbtyq deńgeıdegi eń iri týrnırde qaıtadan brıtandyqtarmen kezdeskeli tur.
Qos ujym eýrokýboktarda 5 márte kezdesken eken. Sonyń qos matchtan turatyn teketiresinde «Lıverpýl» jeńimpaz atanyp, kelesi aınalymǵa ótipti. Ol ǵasyrlar toǵysynda ótken 2000 jylǵy ÝEFA Kýbogy jarysy edi. Mersısaıdtyqtar «Olımpıko» stadıonynda ótken alǵashqy oıynda 2:0 esebimen jeńiske jetti. Syrttaǵy oıynda eki gol soqqan Maıkl Oýen, jaýapty oıyn aldynda úlken basymdylyq jasady. Alaıda jaýapty oıynda kerisinshe «Roma» jeńiske jetti. Biraq ıtalııalyqtardyń soqqan jalǵyz goly kelesi kezeńge ótýge múmkindik bergen joq. Sol jyly ÝEFA kýbogyn «Lıverpýl» jeńdi.
Sonymen qatar bul eki ujym 2001/2002 jylǵy Chempıondar lıgasynyń toptyq kezeńinde bir topqa túsken. Rımdegi alǵashqy oıynda tablodaǵy kórsetkish esh ózgermeı, esep 0:0 bolsa, «Enfıldtegi» matchta aǵylshyndar 2:0 utqan. Aldymen Iаrı Lıtmanen penaltımen esep ashsa, Emıl Heskı ekinshi goldy soqqan.
2016 jyly «Roma» men «Lıverpýl» AQSh-tyń Sent-Lýıs qalasynda joldastyq kezdesý ótkizipti. Onda ıtalııalyqtar 2:1 esebimen jeńgen. Sol oıynda bir qyzyǵy Edın Djekodan keıin, ekinshi goldy «Lıverdiń» qazirgi lıderi Mohamed Salah soqqan.
Jalpy alǵanda, Chempıondar lıgasynyń jartylaı fınalynda «Lıverpýl» «Romaǵa» qaraǵanda kóp oınaǵan. 9 márte jartylaı fınalda oınap, sonyń tek ekeýinde ǵana fınalǵa óte almaǵan. Sońǵy úsh jartylaı fınaldyń úsheýinde de «Lıverpýl» otandas komanda «Chelsımen» kezdesipti. Úsh oıynnyń ekeýinde fınalǵa ótip, tek bireýinde ǵana «aqsúıekterge» jol bergen.
«Romanyń» bir ereksheligi, alǵashqy kezdesýde jeńilip qalsa da, minez kórsetip kelesi aınalymǵa óte alatyndyǵynda. Bıylǵy pleı-off kezeńderinde ol osyndaı jigerdi bir emes, eki ret kórsetti. Aldymen Doneskiniń «Shahterin», odan keıin ataqty «Barselonany» aınalyp ótti. Al qazir osy oıyn aldynda býkmekerlik keńseler kelesi kezeńge senimdi túrde «Lıverpýl» ótedi dep otyr. Oıyn Astana ýaqytymen 00:45-te bastalady.
Ermuhamed MÁÝLEN,
«Egemen Qazaqstan»
