Jıyrma jyldyq mereıtoı aıasynda ótetin aýqymdy is-sharalar úshin respýblıkalyq bıýdjetten jumsalatyn qarajat kólemi de belgili – bas-aıaǵy 19 mıllıard teńgege jýyqtaıdy. Memleket basshysy N.Nazarbaev sáýir aıynyń basynda bas qalany odan ári damytýǵa arnalǵan májiliste:
– Burynǵy Aqmola qalasynyń tóńiregi qandaı bolǵany bərimizge belgili. Jańa qalanyń orny mıdaı dala edi. Qazir qalanyń osylaı damyǵanyna ózim de tańǵalamyn. Biz ata-babamyzdyń armanyn oryndap, Saryarqanyń tórinde el ordasy – Astanany saldyq. Dúnıe júzi tamsanyp, tańǵalatyn shaharǵa aınaldyrdyq. Elordamyzdyń 20 jyldyq merekesin barlyǵymyz birlesip atap ótýimiz qajet. Bul – eldiń qýanyshy, – degen bolatyn.
Bas qalanyń torqaly toıyna elimizdiń oblystary tartý jasap, elordanyń sáýletinde qoltańbasyn qaldyrýǵa nıet bildirip jatqanyn aıta keteıik. Osyǵan baılanysty Prezıdent oblystar qala turmysyna qajetti nysandar salýǵa kóbirek kóńil bólýi qajettigin aıtty. Osy arqyly Elbasy joǵaryda sóz etken qarjyny el ıgiligine jaratýdy meńzegeni túsinikti.
– Merekeni bárimiz jaqsy kóremiz. Men barlyq oblystardyń sharaǵa atsalysqysy keletinin bilemin. Onyń bári bir arnamen, barynsha tıimdi jolmen uıymdastyrylýy kerek. Oblystarǵa tym salmaq salýdyń qajeti joq shyǵar, degenmen elordaǵa tartý jasaǵysy kelgender bolsa ornymen jasalýy kerek. Jaı eskertkish emes, qalaǵa paıdaly kóshe, skver, saıabaq, qandaı da bir nysandar salynǵany durys. Jumystyń eń mańyzdy tusy – kórinbeıtin jaǵy. Máselen, sýmen qamtý, jylýmen qamtý, qoqysty tazalaý sııaqty jumystar. Ol bir qaraǵanda baıqalmaıdy, kórsetip maqtana almaısyń,– degen bolatyn.
19 mıllıard az aqsha emes ekeni ras. Áleýmettik jelilerde ol qarjyny qaıda, qandaı jolmen jaratýǵa bolatynyn aıtyp jatqandardyń da qarasy az emes. Mádenıet jáne sport mınıstri Arystanbek Muhamedıulynyń, Astana ákimi Áset Isekeshevtiń sózderine súıensek, tór qalanyń týǵan kúnine oraılas sharalar bas-aıaǵy birneshe kúnmen nemese birer aptamen shektelip qalmaıdy. Qala halqy úshin, shaharǵa alys-jaqyn aımaqtardan kelgen meımandar úshin uıymdastyrylatyn sharalardyń aýqymy áldeqaıda keń, tipti birneshe aıǵa deıin ulasatyn bolady. Josparlanǵan sharalardyń ótetin jeri de Astanamen shektelip qalmaıdy, Almatyda jáne basqa da iri qalalarda atap ótiledi. Demek, kólemdi qarjy aýqymdy sharalarǵa jumsalady dep paıymdaýǵa bolatyn syńaıly.
Mádenıet jáne sport mınıstrligi, Astana qalalyq ákimdigi jáne basqa da memlekettik organdar muryndyq bolatyn is-sharalardy qosa alǵanda barlyǵy 645 shara ótkizilýge tıis. Bulardyń qatarynda reseılik Marııa teatrynyń gastroldik sapary, halyqaralyq Kann kınofestıvali-2018 aıasyndaǵy qazaq kınosynyń aptalyǵyn ótkizý, Nıý-Iorkte Á.Qasteev atyndaǵy memlekettik mýzeı qoryndaǵy kartınalardyń kórmesin ótkizý syndy sharalar bar.
Mádenıet jáne sport mınıstri Arystanbek Muhamedıuly aıtyp ótkendeı, 15-16 maýsymda ótetin Voice of Astana estrada ánderiniń halyqaralyq festıvali de kólemdi qarajatty qajet etetin jobalardyń sanatynda. Atalǵan estradalyq ánder festıvaline álemdik sýperjuldyzdar shaqyrylmaǵanymen, jaryq pen dybystyń sapaly bolýynyń ózi arzanǵa túspeıdi eken. Bir atap óterligi, mýzykalyq baǵyttaǵy sharalardyń barlyǵynda otandyq mýzyka ónerin, tól kompozıtorlarymyz ben juldyzdarymyzdyń shyǵarmashylyǵyn nasıhattaýǵa basa kóńil bólinedi.
– Biz bıyl festıvaldiń alǵashqy kúnin «A-stýdıo» tobynyń jetekshisi Baıǵalı Serkebaevtyń 60 jyldyǵyna arnaǵymyz kelip otyr. Ekinshi kúnin Batyrhan Shúkenovti eske alýǵa arnaımyz. Valerıı Meladzeden bastap, Leonıd Agýtın, Krıstına Orbakaıte syndy tanymal óner juldyzdarynyń barlyǵy Batyrhannyń dostary retinde osy konsertke qatysýdy paryz sanaıdy,– deıdi A.Muhamedıuly.
Mereıtoı baǵdarlamasyna kóz júgirter bolsaq, 1 shildedegi «Qazaqstan barysy» respýblıkalyq qazaqsha kúres týrnıri, 1-5 shilde aralyǵynda ótetin XIV halyqaralyq «Eýrazııa» festıvali, 7-13 shildedegi I halyqaralyq Wide World teatrlar festıvali, 25-29 maýsym kúnderi ótetin The Spirit of the Dance etnostyq mýzyka men halyq bıi festıvali, Halyqaralyq aqyndar aıtysy syndy aýqymdy mádenı sharalar legi tolastamaıdy eken. Wide World teatrlar festıvali aıasynda halyqaralyq sımfonııalyq orkestr súıemeldeıtin Karl Djenkınstiń Chune Astana odasynyń saltanatty premerasy, «Operalııa» festıvaliniń baǵdarlamasynda Muqan Tólebaevtyń «Birjan-Sara» operasy qoıylatynyn atap ótken lázim.
Jyl saıyn maýsym aıynyń orta sheninen bastap qala kúnin toılaý qyza túsetini belgili. Bıyl merekelik sharalardyń legi, shahardaǵy merekelik kóńil kúı birer aptanyń aıasynda saıabyrlap qalmaı, jaz boıy tolastamaýy tıis. Bul elordalyqtar úshin de, Astanaǵa jazda qydyryp keletin meımandar úshin de yńǵaıly bolary sózsiz.
Qarap otyrsaq, Astananyń 20 jyldyq torqaly toıyn halyqtyń kóńilinen shyǵatyndaı joǵary deńgeıde, sán-saltanatyn jarastyryp ótkizý josparlanǵan. Oǵan jumsalatyn qarjy da aldyn ala oılastyrylyp, tıimdi jumsaý jaǵy qarastyrylǵan. Endigi másele osy qarjyny eldiń mádenı, áleýmettik, turmystyq ıgiligi úshin tıimdi jumsaýǵa tireletini túsinikti. Joǵaryda Elbasynyń sózinen keltirgenimizdeı, elordamyzdyń 20 jyldyq merekesin barsha halyq birlesip atap ótýi kerek. Sebebi bul – elordanyń nemese elordalyqtardyń ǵana emes, tutas eldiń qýanyshy.
Arnur ASQAR,
«Egemen Qazaqstan»
