Boz kilem ústinde oblystyń barlyq qalalary men aýdandarynan kelgen 200-ge jýyq balýan baq synady.
– «Saryarqa barysy» týrnırinde qazaq kúresindegi erejelerde qarastyrylǵan barlyq salmaq dárejeleri boıynsha balýandar kúresti. Al «Qazaqstan barysy» respýblıkalyq týrnıriniń irikteý beldesýlerine qatysýǵa 16 sportshy ótinim berdi, – dedi saıystyń bas tóreshisi Nurmuhambet Jaılaýbaı. – Qazir qazaq kúresine degen zor qyzyǵýshylyq bar. Buǵan «Qazaqstan barysy», «Álem barysy» jáne «Eýrazııa barysy» syndy jarystardyń dástúrli túrde ótkizilýi aıryqsha yqpal etip otyr.
Jarys qorytyndysynda 55 kılo salmaqta qaraǵandylyq Narıman Tutqush qarsylas shaq keltirmedi. Nura aýdanynan kelgen Dinasyl Ysqaq 60 kıloǵa deıingilerdiń dodasynda aldyna jan salmady. Qaraǵandylyq Elaman Qýanbaı 66 kılo boıynsha jáne 74 kılo salmaqta Tólepbergen Qaıyrǵalı chempıon atandy. 82 kılo salmaq dárejesinde Marlen Janǵabaı, 90 kılo synynda Erqanat Moldaǵulov (Buqar jyraý) úzdik shyqsa, 100 kıloǵa deıingi salmaq dárejesinde Shahtınsk qalasynyń atynan kúresken Ádilhan Qaıyrjanuly altyn medalǵa ıe boldy. Asa aýyr salmaqta Ernazar Benashevtiń baǵy jandy.
Al «Qazaqstan barysy» týrnıriniń irikteý synynda óner kórsetkender arasyndaǵy dodada qaraǵandylyq balýan Erjan Shynkeev bul joly da qarsylas shydatpady. 2018 jyldyń «Saryarqa barysy» atanǵan ol endi Abaı aýdanynyń balýany Ersin Muhametjanovpen birge «Qazaqstan barysy» týrnırinde Qaraǵandy oblysynyń namysyn qorǵaıtyn bolady.
Qaırat ÁBILDA,
«Egemen Qazaqstan»
QARAǴANDY
