«Halyqaralyq túrki akademııasy bıylǵy jyldy Shyńǵys Aıtmatov jyly dep jarııalaǵan edi. Búgingi forýmdy qazaq-qyrǵyz zııalylarynyń beıresmı forýmy dep aıtýǵa bolady. Sebebi, búgingi jıynǵa Qyrǵyzstannan bedeldi memleket qaıratkerleri, bedeldi aqyn jazýshylar kelip otyr. Sondyqtan búgingi jıynda Aıtmatovtyń shyǵarmalarymen birge, Alataýdyń eki betin bólise jaılaǵan baýyrlas halyqtarǵa qatysty pikirler aıtylady», - dep atap ótti Halyqaralyq Túrki akademııasynyń preızdenti Darhan Qydyráli forýmnyń ashylýynda.
QR Prezıdent Ákimshiligi Ishki saıasat bóliminiń meńgerýshisi Aıda Balaeva Alataýdy birge jaılaǵan qos eldiń dostyǵyn nyǵaıtý jolyndaǵy eńbekteri úshin qyrǵyz ben qazaq qaıratkerlerine rızashylyǵyn bildirdi. «Aıtmatov shyǵarmalarymen tutas býyn tárbıelendi. Onyń naǵyz ómirden alynǵan keıipkerleri men oqıǵalary árbir oqyrmanǵa etene jaqyn. Qalamger týyndylarynyń ózektiligi qazirgi zamanda tipten arta túsedi. Adamnyń jan dúnıesiniń tazalyǵy, oıy men isiniń úndestigi, tabıǵatpen úılesimdi bolýy - qazirgi ýaqytta búkil adamzattyń aldyndaǵy problemalar. Tereń fılosofııalyq maǵynasy bar Aıtmatov týyndylarynyń túpki ıdeıasy Rýhanı jańǵyrý baǵdarlamasymen úndesip jatyr. Osyndaı uly qalamgerdi halyqaralyq deńgeıde ulyqtaý - tutas túrki jurtynyń eldigi men birligine laıyq is», - dedi Aıda Balaeva halyqaralyq forým barysynda.
